【阿碌開咪】不可講真/假話！

讀書時，讀過西諺——Honesty is the best policy，誠實，乃處世的最佳宗旨。

　　事實，誰喜歡與「大話精」交朋友？

　　一次不忠，百次不用，也是基本行走江湖的道理。畀你呃一次，我渣。畀你呃兩次？我咪死蠢？所以，一次之後必割席！

　　以上，全對！不過，隨着人生經驗豐富，你就知道，Sometimes, honesty is not the best policy，甚至會製造災難（Disaster）。

　　這個，政治人物及外交談判高手必心照。鋪鋪講真話？你根本無質素升做高官！

　　香港有位明星級高官，對下屬立下錦囊——面對公眾，只可講一半事實（Half Truth）或閉嘴（Shut Up）！因每項公共政策，都牽涉不少持份者的利與害，無論點，都有對頭人。為令事件圓滿解決，應只講能夠完成目標的「半真話」！

　　大家成年人，若不開竅，等於你還是活在「嬰兒期」——只有單純一面。

　　今日跑馬，講講練馬師，也是一個不能「講真話」的角色，否則，你可能會損失慘重！

　　現實例子，正是呂健威。一周前佢威爆玻璃，因國際一級大賽千六米那場，衝綫時只有兩匹馬鬥，皆為佢旗下馬，馬王「金鎗六十」及另一匹「幸福笑容」。全港馬迷最後五十米有點嚇呆，因「幸福笑容」幾乎劏咗「金鎗六十」，只差一個馬鼻。賽後N人訪問練馬師，點睇？驚唔驚「幸福笑容」鍊低「金鎗六十」？

　　老江湖一定答：「邊隻贏我都高興！」點知「老實呂」如實答：「驚㗎！」有乜含意？係咪唔想「幸福笑容」贏？答案傳到馬主耳中，即扯火，轉倉！如此，立即冇咗一匹頂級馬。咁坦白，為乜呢？一句話即令馬房最少冇咗幾百萬元獎金，慘情！

　　上周日韋達輸三千幾萬W飛，食白果！今晚反彈！「運利多」、「天火同人」、「各取所需」及「彩虹之光」WP過關啦！

曾智華

阿碌開咪