《姊妹淘》主持互數缺點 張寶兒被爆經常「消失」

莊思敏、張寶兒、蔡嘉欣、陳詩欣與主播許文軒（Edmond）齊齊拍攝TVB娛樂新聞台賀年特輯，適逢牛年，眾人特地親親牛牛玩自拍，又同Edmond玩水上單車，更大爆《姊妹淘》主持成員缺點，希望新一年有所改善。

蔡嘉欣直指張寶兒經常「消失」，笑說：「傳短訊畀佢幾日先覆！唔開心時又收收埋埋，唔話畀人知！」張寶兒回應時亦表明不滿意自己這方面，說：「我唔係一個主動融入群體生活嘅人，好多時候佢哋搵我出嚟同Message我，我都會Miss咗佢哋嘅聚會。嚟緊我出嚟多啲，會睇佢哋啲Message，真係要好好珍惜佢哋！」
嘉欣又表示陳詩欣講話時「好惡」！嘉欣笑說：「唔好睇佢個樣公主咁款！佢對男友超惡，食住男友，希望來年可以溫柔啲！其實我都有俾張寶兒話我講嘢太直接，又俾莊思敏話我講嘢太快，所以新一年都要改善下。」

陳詩欣說：「叫莊思敏唔好成日請我哋食嘢！（其實係咪攻心計想整肥你哋？）係Edmond你講架！唔關我事，依家佢多咗一個缺點！」莊思敏亦不甘示弱，說：「其實我好怕Part佢，因為佢好瘦，我喺佢隔離，個個都話我肥咗！張寶兒就成日補妝，依家好啲，不過多咗個缺點就係成日漏嘢，佢會成日漏低化妝品喺廠。」

談到生B問題，莊思敏和張寶兒不約而同表示不心急。莊思敏說：「因為疫情同老公分隔兩地，冇見咁耐，各自努力事業先，打好基礎，希望見面時就可以把握時間一齊，去下旅行，想Keep住愛情拍拖嘅感覺。」陳詩欣笑說：「結婚隨緣啦！自從好友余香凝結咗婚，真係多咗人問我。其實公開咗拍拖都係好事，話畀大家知我係有男友，因為之前真係好煩，實在有太多男仔追求我！哈哈！」