【獨家】開網店賣自家品牌服裝 王梓軒創作劇本立志做監製

受疫情影響打亂咗工作及生活，因為多咗時間令王梓軒有更多學習機會，由藝人變身時裝網店老闆，他更度好咗幾個劇本，立志做埋戲劇監製，打算跨國界合作拍戲再喺合適平台出售。有危自有機，喺經理人石祐珊(薛家燕大女)支持下，34歲王梓軒為事業衝衝衝！採訪：方騫平 場地：My Fitness 服裝：D-mop

王梓軒投資6位數字開設自家時裝品牌網店，背後原來有段「故」：「去年初去美國casting，點知疫情一發不可收拾，被迫滯留喺洛杉磯8個月，除咗修讀短期演技課程外，仲同當地年輕人創作咗5個，唔同形式、唔同地方、唔同規模嘅劇本，立志做埋監製，不過仲有實際資金問題有待考量。原來做監製唔容易，由創作故事到埋班，甚至放喺邊個平台播出，乜都要一腳踢，今次真係學到嘢。」

疫情下搵賺錢機會
另外，疫情下少咗人出街，網購意慾增加，王梓軒同珊珊又着手搞網店：「我構思嘅卡通公仔Shitto Kun（酸葡萄）好搞嘢，成日玩自嘲，好唔抵得人，有唔少『賤嘴語錄』！如喺冷帽度寫上『same shit to different day』(日日都係咁衰㗎啦)，其實都係想表達喺疫境下，大家嘅酸溜溜情緒，只想大家得啖笑嚟釋懷。」除創作咗一系列衛衣、冷帽及和潮牌crossover背囊外，梓軒還鼓勵跟fans互動，邀請佢哋做設計師設計短襪，由才華變成實體產品，又可出售獲利。