【首交代廖啟智病況】去年12月確診胃癌 陳敏兒籲朋友勿致電問候打擾休養

廖啟智（智叔）傳出去年患上胃癌更一度病危，最後全靠意志力捱過呢一關。病情穩定後現於私家病房休養，而太太陳敏兒則一直在身邊悉心照顧。智叔所屬娛樂公司昨晚亦發出聲明証實智叔目前已停工並全面休養中，盼外界給予尊重及空間。

今日下午約1時10分，智叔太太陳敏兒抵達醫院私家病房，在場數十傳媒即時上前拍照及採訪。陳敏兒即主動停下來交代智叔最新情況，她說：「智叔一直都有跑步，舊年因為疫情冇乜嘢做，佢全年都有跑步體能好好。但去到舊年12月中嘅時候，開始覺得食嘢嘅時候個胃脹住，去做檢查，確診咗係胃癌。跟住入院做治療，好感恩我哋遇到好好嘅醫生，好悉心照顧，同智叔好夾，我哋好感恩。醫生都話智叔係一個A+病人，因為佢真係好合作，醫生叫佢做啲乜嘢佢都好配合。」她提到智叔有時候個胃唔舒服，但醫生提醒他正在打仗需要營養，因此智叔將一日三餐當成責任，努力完成每一餐。她笑說：「大家都知道智叔做戲好專業好投入，原來做病人都一樣咁專業，我睇到佢好識得去幫自己渡過好多挑戰同困難嘅病人，我心底裡都好佩服佢。醫生話我同埋囝囝作為家人都係A+，大家好冷靜，亦好配合醫生同病人嘅需要。」

另外，陳敏兒特別提到智叔近兩日的確有點疲累，因他患病的消息已傳開，接受不少電話慰問及訪問。她說：「有啲分心，比較疲倦。我都好想講，用返智叔嘅說話：『好多謝大家嘅關心，但太多關心同問候，對於佢嚟講，對於家屬嚟講係一個負擔，收到晒大家嘅關心。』所以大家係錫智叔嘅話，可以遙送祝福畀佢就得喇！我嘅交代亦差唔多，希望大家都唔好再打電話畀我，我諗我都唔會接電話，佢都唔會接電話，因為醫生都唔贊成，咁樣會影響佢養病。希望大家都合作。」



陳敏兒約於下午2時30日離開私家病房，神情輕鬆的她透露智叔面色不錯。她提到政府醫院私家病房只容許探病1小時，但已覺得相當不錯，非常感恩。有記者問智叔胃癌屬第幾期？她說：「唉⋯ 唔好問呢啲嘢，我已經交代晒詳情。」她再次感激傳媒關心，重申朋友們不要致電，讓智叔好好休息。