【維港會】網民憂店貓健康倡帶求醫 街坊澄清獲善待：咪睇圖就話病貓

過往不時有陌生人因做好心或誤會帶走貓狗引發虛驚。有網民在荃灣見到一隻貓無精打采地躺臥在行人路上紙皮箱，於是發文向網民求助，於是引發一批網民擔心恐防遭受不當對待或患上疾病。不過一眾荃灣街坊急忙澄清，該隻貓已經19歲，只是年事已高並非病貓，只是虛驚一場。

有網民在facebook群組「天下貓貓一樣貓」上載照片，稱在荃灣香車街街市附近見到一隻店貓悶悶不樂，於是問「佢狀態好似好差咁。有冇人知道呢隻貓嘅狀況？」

網民紛紛留言大為擔心，「係呀真係見佢呢個狀況好耐，之前都唔知道佢係邊間舖頭嘅因為成日瞓喺街嗰度，其實都唔知可以做得啲乜嘢，只係覺得佢好慘。」、「好似病得好嚴重, 不如帶去睇醫生先啦」、「明知病，點都要帶佢去睇醫生，了解牠情況」

不過荃灣區的網民急忙澄清， 「佢都唔知幾好食好住，天氣熱去隔離舖門口涼冷氣瞓覺，冬天佢主人就唔畀佢出門口，驚佢病。到時到後又有嘢食又有罐罐。佢係年紀大，睇落去咁都好正常。唔好話人養唔好呀。我差唔多日日都行過嫁。佢好聽主人講嫁，有次主人收舖，佢仲想出去玩，結果俾人話，之後乖乖入返舖。唔好偷貓呀，佢算係果頭出名貓嚟嫁。」、「唔係，店主同我講有買維他命補品畀佢食。始終隻貓老，店主對於『愛錫寵物』同我哋嘅認知唔同，但一定唔係不理死活。」

有荃灣街坊表示，「佢係好老好老，近半年個老態出晒來。是舖頭猫，會跳上陌生人身上的。一年多前睇落唔似老人家， 主人因為怕佢肥，有保持佢飲食，養到18-9歲，咪話人唔識養」

有網民就奉勸不要亂下定論，「活到19個年頭衰極有限，唔好見佢瞓街就覺得好慘，佢有佢自在」、「19歲老貓係會冇咁精靈架啦。睇圖就話係貓病仲話要捉去睇醫生....」、「就算係愛貓的人，都應該唔好… 亂咁斷估 …去自己推斷一大餐就話係病貓！噚日探佢，真係骨瘦嶙峋得很！但睇住佢仲肯主動落地行去食嘢！」、「好多街坊明事理，佢始終年紀大，身體無以前咁好，但唔代表係病貓」。

發文者隨後亦放下心頭大石，「咁大年紀嘅話都理解佢嘅狀況，起碼店主對佢都有心嘅，知道咗都安樂啲」。

圖片轉載自「天下貓貓一樣貓」