獨家丨陳寶華嘆中港年輕一代冇人情味獲內地高官評三觀很正

2022-07-24 10:30

主力在內地發展的著名編劇陳寶華，最近回歸香港為開電視的劇集《獅子山下的故事》擔任總編劇，再寫香港情香港事。曾獲內地高官評為三觀很正的寶華姐，眼見現在中港年青人變得自私又冷漠，感受特別深，擔心再難見八、九十年代的人情味。她又盛讚胡杏兒是個專業兼人品好的演員，由她出任女主角，對該劇幫助很大。

採訪：杜淑霞攝影：沈健程

《獅》劇橫跨香港35年，講述三代的溫情故事。

《獅》劇由1985年寫到2019，是個橫跨35年講述三代的溫情故事，當中描寫了很多香港的大事件，對於寶華姐來說感受最深應該是1996年的嘉利大廈大火，因她曾經跟該次災難很接近，「嗰日我喺尖沙咀美麗華酒店行出嚟，感覺到好大陣燒焦味，聽到有人話裕華百貨嗰邊火燭，望到個天好多黑煙飄緊過嚟，我冇八卦行過去，但嗰晚睇電視，原來當時發生緊呢啲事，睇見都好驚心動魄。」

杏兒在劇中飾演女主角「梁歡」，寶華姐大讚冇揀錯人。

劇中杏兒和吳千語飾演兩母女。

對於女主角杏兒表現，寶華姐大讚她最個最佳選擇，「呢個演員好鍾意做戲，好愛戲，我對住呢啲演員就投降，唔使擔心佢唔愛我個劇本，佢人品亦都好好，永遠唔會投訴任何嘢，只會幫我哋手解決困難，仲會調返轉頭鼓勵我哋。」而本身有齊中國婦女美德的杏兒，寶華姐認為做「梁歡」一角最適合，「佢好賢良同埋對於家庭觀念好重，佢個倫理觀念好強，睇佢帶埋細仔嚟開工就知。」

杏兒帶埋細仔一齊開工，獲劇組封為「三阿哥」人人錫。

望作品能給人正能量

寶華姐的作品，除了愛以女性角度說故事外，還有豐富人情味，而且價值觀相當正確，她亦承認會不自覺將個人想法放到作品上，更自爆：「曾經有個領導同我講，我嘅三觀好正，即係世界觀、人生觀、價值觀都好正確，咁我有讀書，老師有教嘛！哈哈！」而她認為這原因亦令她早在19年前，已順利打入內地巿場，「三觀係冇文化差異，好睇嘅戲劇係全球性，好似我哋睇印度戲點解會覺得好睇，因為有愛、有情嘅嘢係國際性。」

除了杏兒，該劇還有好戲之人謝君豪。

該劇還有吳千語、周柏豪和許雅婷演出。

不過寶華姐承認八、九十年代的人情味，現在可能只能在戲劇世界才能找到，因她發覺年輕一代，變得自私又冷漠，「可能係互聯網或者手機文化影響，大家生活既枯燥又迷茫，好似我喺機場拎住好多行李上機鐵，後生仔掛住望電話都唔會幫我，反而係上咗年紀嘅男人幫手，搭地鐵有對白晒髮嘅夫妻企喺面前，兩個年輕人掛住打機，我出聲叫佢哋讓位，佢哋望吓都冇理。」而內地情況亦一樣，「我哋喺內地拍呢套劇時，有日我同（謝）君豪食完飯上返酒店房搭𨋢時，有幾個年輕人入嚟，佢哋冇戴口罩，我忍唔住出聲話佢哋咁自私，佢哋落唔到台就駁我『我喜歡呀』我話返佢哋『國家好不容易發展到現在，如果年青人這樣子不可以』佢哋好快就走咗，我返到房都打電話畀酒店經理投訴。」所以她最希望作品能帶給大家正能量，「最希望令到佢哋有返啲希望，同埋有啲樂趣。」