Edan凌晨撰長文指無悔拍《I SWIM》角色衝動自稱為「ViuTV吳卓羲」

2022-07-24 13:45

由呂爵安（Edan）、魏浚笙（Jeffrey）、袁澧林及吳海昕等主演、馮志強執導的ViuTV劇集《I SWIM》，前晚（22日）播出大結局，但卻被不少觀眾及網民批評結局「爛尾」及「太膠」，由於群情洶湧，馮志強也在社交網留言聲言會檢討。在劇中飾衝動好勝「李馬榮」的Edan，今早凌晨在紅館綵排完MIRROR演唱會後，終在社交網撰長文分享感受。

今次角色一改以往搞笑形象，是嚴肅、好勝和衝動。

一眾男演員為此劇操fit身形及游水。

Edan本身不擅游水。

「如果擔心就唔試，我乜都唔洗做」

Edan長文謂：「有人問我，你會唔會好失望啊？真心嗰句，我自己真係冇嘅，反而好興幸自己有參與其中。拍攝嘅過程固（故）然學到好多嘢，但原來一個作品出街，睇返整個作品，再睇返自己嘅表現，同觀眾嘅意見，係會再令自己學到更多嘢，令自己有所成長，而哩啲經驗，就係可以比（俾）你用喺之後嘅演出，之後嘅作品上。

今次李馬榮哩個角色，的確唔係自己做開嘅類型。當初做嘅時候，都好擔心自己會唔會太死咕咕，會唔會淨係演到個角色好死好唔自然，另一方面，又擔心大家會唔會睇唔慣，會唔會唔相信哩個角色，會唔會唔鍾意哩個角色。

但係如果我因為驚就唔試，我就永遠都冇機會做其他類型嘅角色，大家就永遠都睇唔慣我做其他性格嘅角色，如果我因為擔心就唔試，咁其實……我乜都唔洗做㗎啦，上台表演都擔心㗎，咁係咪唔做啊？

唔做，就唔會知自己有咩做得唔好，就唔會知自己有咩需要進步
可能有人今次睇唔慣，但經過今次之後，可能你就會睇得慣呢
可能今次做得未夠好，但經過今次之後，下次咪可以做好啲囉
所以，一定要做……

其實有意見先會有進步，盲撐係唔好，但盲_亦都唔好，所以我哋係好歡迎啲客觀建設性嘅意見。唔怕老實講，我自己有時睇到啲負評都好confuse（疑惑），話我唔緊要啊，講得啱嘅我會聽，然後盡力改。但有時我分唔到啲負評係因為本身唔鍾意我定點，搞到我都唔知take唔take好，不過都係嗰句，姐係要再做好啲囉。

有討論其實真係一件好事，有人講好過冇人講。但我覺最緊要係大家要繼續支持香港嘅創作同製作（唔止係劇集啦）。成日問點解外國嘅好咁多，喂大佬人哋多咁多資源，多咁多人才，多咁多support。你幾可聽到一個後生仔話大個想做導演想做編劇？所以大家_嘅同時，都要繼續大大力支持，咁件事先會越嚟越好覺得有問題有唔好嘅就比（俾）意見，希望佢下次變好！

講完，沖涼瞓覺！多謝iSwim，多謝導演，多謝所有台前幕後，多謝有睇有討論嘅每一位，多謝李馬榮（Viutv吳卓羲），哩段旅程好難忘，希望大家可以繼續支持香港嘅作品，亦希望大家下一次又可以見到一個唔同咗嘅Edan啦！」

當中Edan亦指其實幕後團隊比演員更辛苦，形容他們是付出200%的心血及200%的力在此作品上，他亦讚導演馮志強是用愛去投入拍攝。