【疫下陀Ｂ】郑佩佩留美未能抱孙　原子鏸：生完一定去见佢

原子鏸（Marsha）去年9月宣布跟摩洛哥籍丈夫Mehdi El Ajimi造人成功，囝囝预产期为今年3月，日前Marsha趁分娩前，跟丈夫一齐影大肚相留倩影，虽然Marsha陀住6个月肚腹大便便，但体态依然纤瘦，做起瑜伽动作依然自如。她又透露妈咪郑佩佩正在美国未能第一间抱孙，但生Ｂ后一定会带去美国见妈咪。

Marsha表示现已怀孕6个多月，没有早期的妊娠不适，惟每次饱肚会有「顶住」感觉，「个肚愈来愈大，食饱更加觉得好似顶住，抖唔到气咁，要趴喺度抖，所以我嘅食量冇话特别多，但晚餐唔会食太多。」而Marsha透露有一直做瑜伽及散步，每日差不多做两、三小时运动，「本身喜欢做运动，唔想自己会好肿，所以日日都有运动，其实我做完瑜伽之后，发觉佢（BB）喺肚里都会郁好多，好似喺肚里做瑜伽咁。（老公有冇支持你做瑜伽？）支持，但一开始佢都有啲惊，老师都叫我小心啲。」问到产检时有冇见过BB的样子，究竟是似爸爸定似妈妈？Marsha表示：「有照过，但净系见到BB个鼻，佢（BB）用手遮住个样，其实我想佢似老公，男仔嚟想佢Man啲，想佢好似我老公咁曲发，但老公就话想佢似我会靓啲。」

疫情肆虐Marsha也有格外小心，「去街返屋企第一时间洗手、冲凉。」问到身在美国的妈妈郑佩佩可有紧张她怀孕？Marsha说：「妈咪冇特别紧张，不过我哋每日都会电话联络，佢喺美国都好少出街，由二家姐照顾佢，我生完之后一定会带小朋友去美国见佢。我当然想妈妈喺身边，但冇办法啦。（妈咪有冇教补身？）妈咪话佢完全唔记得啲嘢。（妈咪有冇帮BB改中文名？）妈咪冇要求，中文名留畀我爹哋去谂，如果唔畀爹哋谂，佢会唔开心。」不过原来Marsha现时还未添置BB物品，因屋企正准备装修，「都系油吓油、加度门，搬走啲家俬，到时我哋会搬去另一个地方住两星期，等啲装修味冇咗就返嚟住。」