【独家】搵黎诺懿介绍信得过「笋盘」高海宁坚持唔靠男人靠自己

2021-02-05 00:10

由五年前《爱回家》开始，现已变身「美食达人」嘅黎诺懿跟34D「咪神」高海宁(高Ling)系受欢迎组合，所以明晚(周六) 11时TVB播出嘅《big big shop今晚请客庆团年》再搵嚟两人拍住上，以优惠价推销贺年产品。诺懿对好拍挡高Ling赞不绝口，后者即叫他介绍「笋盘」，但一定唔要假桃花及烂桃花，强调：「唔好嘥我时间！」采访：方骞平

上周黎诺懿及高海宁喺节目中介绍上海名菜烤麸，高Ling说：「上海人注重意头嘢，烤麸即系『靠夫』，喻意老公喺新一年可以愈来愈好！」诺懿笑住寸她：「唔怪得我老婆成日叫我食，但你仲食？」高Ling扁晒嘴反驳：「我靠自己。」高Ling事后话系自己嘅心声：「我性格独立，从来都系靠自己。」

诺懿赞高Ling零缺点
　　
黎诺懿对高海宁评价好高，猛话她样靓身材正，口齿伶俐兼善解人意，好锡身边朋友，愿意花时间喺朋友身上，而且入得厨房出得厅堂，识煮饭嘅人系会加分嘅，他自爆说：「好似我咁，当年用厨艺嚟吸引老婆，有次煮咗佢最爱嘅星洲胡椒蟹，佢开始发觉我嘅好处，之后食完一道菜又一道，一直食到𠵱家。」

五亿驸马最后靠自己
黎诺懿好感恩成为「疫境厨神」，喺咁艰难环境为自己开拓咗一条新路：「当年被指『五亿驸马』，我坚持希望用行动改变大家亦留返畀大家慢慢睇，就算点讲都冇用，𠵱家创出一片天嚟照顾到家人。」至于34岁，回复单身嘅高Ling希望今年有更多好剧集，唔心急拍拖：「等诺懿两公婆慢慢帮我筛选，搵到好嘅先弹畀我啦！」