【独家】牛年行运 首度剖白拒做大马少奶奶原因 龚嘉欣唔使男人照顾

31岁的龚嘉欣在TVB台庆勇夺「马来西亚最喜爱TVB女主角奖」及「最受欢迎电视女角色」，正式「升呢」TVB一线姐仔，嚟紧会主演4套剧集，好受重用，牛年绝对有运行。嘉欣终于上到位，背后付出好多，除咗拍到周身伤患外，去年更放弃做大马少奶奶，她亦默认有呢件事，「我唔会为结婚而结婚，𠵱家我真系好开心！」采访：方骞平 摄影：梁志明

盛传龚嘉欣去年有机会嫁畀锡到佢燶，送车送楼兼送火锅店嘅「富二代」男友Bryan，更已择好日子，只要女方应承就可以做大马少奶奶。但因为龚嘉欣唔想长留当地，过住啲相夫教子，平淡「少奶奶」生活，最终放弃嫁入豪门，继续留港在演艺事业上搏杀！

等紧体谅佢嘅人
问到点解有少奶奶嘅福都唔去享，嘉欣默认：「我都31岁人，唔算系细个啦，如果考虑结婚，最重要系家庭同事业取得平衡，搵拍拖对象唔难，但要搵到一个人可以互相支持对方嘅工作唔容易，而且作为娱乐圈人，仲要顾及埋另一半嘅感受，更加唔系易事。」当姐仔个个都想嫁个有钱人，但她却放弃可以「上岸」嘅对象，记者表示可惜，她即说：「我唔会为结婚而结婚，我第一份工系做演员，就算𠵱家出现另一半，都唔会为佢放弃艰苦经营咗13年嘅事业，而且我唔使男人照顾我，我靠努力去争取𠵱家拥有嘅嘢，我觉得咁样会好开心，所以𠵱家好开心，亦唔介意将来公一份，婆一份。」嘉欣强调目前等紧一个会体谅到佢嘅人，「𠵱家叠埋心水调养同赚钱，除咗要供楼，拍《大酱园》时因为太攰，搞到耳水不平衡要入院治疗，当时好无助同忟憎，埋怨自己唔调理好身体。」

唔同蔡思贝比较

龚嘉欣不敌蔡思贝失落「视后」，但因为剧集《杀手》及《香港爱情故事》赢尽口碑获封「民选视后」，还有唔少网民替她不值。她开怀大笑，反问：「系咩？哈…咁样我经已好满足，其实都冇谂过嗰两套剧会咁爆，做人要知足，对我嚟讲系好大鼓励，增加咗唔少自信心，相对会对自己要求更高。」对于蔡思贝夺视后备受争议，她即避谈：「我唔想比较，我冇谂点解唔系视后，其实都关乎观众口味，锺意边类剧种，我谂最重要系实至名归。但我有咁嘅成绩，我好开心。呢刻攞唔到视后唔紧要，可能系好事，证明我要更加努力。当然，都想尽快可以达到视后目标。」