【独家】闻廖启智病逝难接受关宝慧袁富华望《两夫妻》可重演

2021-03-29 09:00

关宝慧和袁富华（Ben）最近首度合演由邓树荣执导的舞台剧《两夫妻》，昨晚顺利完成11场演出，两人很感恩能在疫情下场场爆满，所以很期待能尽快重演，而导演邓树荣承认已有计划，但要待场地安排。当宝慧和Ben哥得知廖启智病逝消息，两人大感难接受，他们只望智叔一路好走及其家人保重。采访：杜淑霞

完骚后，宝慧和Ben哥到大堂跟观众合照，两人亦大谈演出后感受。宝慧说：「11场演出好顺利，场场都爆晒，真系开心到不得了！原本打算做20场，但啲飞到开始演出先卖晒，想加场都加唔到，希望导演可以安排重演，真系唔舍得，啱啱先熟识成件事就话完啦！」她又要感谢戏中「老公」，「佢帮我好多，佢同导演不断提点我，系毕生受用！（Ben：唔好咁讲啦！）真系㗎！我冇留意到嘅嘢，全部系佢哋教我㗎！我做演员会有盲点，佢哋全部留意到。」

搞笑打算结婚

Ben哥就觉得疫情下有此成绩好感恩，「初头都担心唔知排得咁辛苦有冇得做，大家有个信念，努力就有回报，初头啲飞唔系去得好好，慢慢就嚟。」他亦好赞成重演，「头先我都咁样同佢讲㗎！我哋沉淀吓，等佢再rerun，将个感情再深化啲。」笑他们「夫妻关系」再深厚啲先重演，宝慧即讲笑话：「不如我哋试吓结婚！（Ben：唔好试啦我哋直情结婚！）听日去注册，注咗再话你哋知！」

本来两人心情轻松，当告知智叔病逝消息，他们即时面色一沉，宝慧不停说：「点解会咁快㗎！」之后定过神才说：「我喺TVB时同智叔合作过两套剧，一套系《射雕英雄传》，一套我哋仲演情侣，真系好难接受，点解会咁㗎！希望（陈）敏儿保重，智叔亦一路好走。」Ben哥说：「我同智叔《烟雨红船》系第一次合作，跟住有啲电影都有合作过，佢系我一直好尊敬嘅演员，希望佢屋企人要保重，大家真系要珍惜当下，呢个消息实在太突然，真系消化唔到。」　