【独家】开刀解决逾十年宿患 方健仪唔再讳疾忌医

方健仪（Akina）由一位专业新闻主播变身KOL，健康形象的她喺疫情下有唔少收入，仲喺沙田中学母校附近屋苑做埋业主。方健仪自爆曾因为唔敢做手术，讳疾忌医，即使患有「女人病」朱古力瘤，另外又患上痛到飞起嘅肛门瘻管超过十年都唔理，好彩得到正确资讯后，引刀一快，𠵱家冇后顾之忧。 采访：方骞平

方健仪除咗做港台节目《精灵一点》外，周一至五晚上9时跟李雨阳、李丽珊(Lisa)主持香港开电视健康节目《Fit开有条路》，方健仪个中亦有得着，尤其疫情下大家更加要注意健康，所以愈做愈起劲。她更分享年轻时讳疾忌医嘅痛苦经历，「20几岁时因为肛瘻睇普通科医生，医生话术后处理得唔好嘅话有机会失禁，咁就吓到我唔敢做手术，宁愿痛爆同埋流出分泌物，直至年前接触到专科医生谜底先解开，原来呢个只系小手术，20几分钟就搞掂，真系后悔医得太迟。」

对于拍档李丽珊初为人母，Akina就无意生B，「我年纪唔细啦！𠵱家好享受两公婆自由自在，可以忽发奇想，元旦日凌晨四点起身上山睇日出，而且膝下无儿更加有时间照顾到双亲。」目前她努力赚钱，陈志云更钦点她成为生发代言人，「我呢啲『小薯仔』，喺TVB时未同佢合作过，只系同TVB高层交流饭局见过，有次喺电视城电梯入面相遇，意想唔到10几年后，佢会引荐同我合作。」