独家丨余慕莲出自传:最好瞓瞓吓走冇痛苦大病后咳到哮喘已安排捐身家

2022-08-12 06:58

前年11月，85岁余慕莲（余毛）患上罕有嘅血液炎伤害到个肺，导致肺纤维化一度危殆入住ICU，虽然执返条命仔，但身体跌晒Watt，日日咳到甩肺。《头条娱乐》记者目击余毛姐喘晒气狂咳3分钟，甚至咳到眼泪鼻涕齐流，真系好阴公。她面红红兼喘晒气说：「最好瞓瞓吓死咗，冇痛苦。」𠵱家余毛姐做人宗旨系过一日赚一日，活在当下！采访：方骞平

余毛性格乐观，已安排好自己身后事。

真系咳得好辛苦。

余毛接受访问前劲咳3分钟，咳到标晒眼水及鼻涕，面都红埋。

余慕莲推出自传《我是一条豆角》，不扣除成本，收益全数拨捐儿童癌病基金，余毛善心得到一呼百应，初版2000本全被内部认购，再版2000本都几乎被朋友扫清，要印第3版才能推出市面公开发售。

余慕莲最近推出自传《我是一条豆角》，反应热烈。

最自豪做Model行天桥

早于2008年余毛拍第3辑《向世界出发》时经已有人打她主意出自传，但她不为所动，直至近期因为执屋，掉走一啲旧相，朋友见到提议她出自传：「𠵱家唔掉(旧相)，第日死咗人地咪一样系掉，咁朋友话出咪出罗，反正系做善事，我后生都几靓㗎！」

2008年余毛拍第3辑《向世界出发》时经已有人打她主意出自传。

余慕莲陈年泳照喺自传中曝光。

小时候嘅余慕莲面尖尖，双眼好精灵。

少女时靓相。

系索女嚟喎。

余毛因父母离婚，所以她唔打算结婚，早于40多年前影婚纱照留念。

自传中满载朋友温情，除米雪、林建明等关爱外；仲有提及陪李香琴出埠登台，汪明荃忽发奇想建议她一齐上台玩，还提供埋啱身嘅二手战衣，兼有专人化妆，让余毛姐可以靓靓登场：「我好锺意登台，旧公司成日丑化我，我唔锺意，做到无晒瘾，70岁就退休。」自传中当然唔少得讲到「大恩人」邓达智大胆用她做Model，喺大会堂行Catwalk，余毛姐谂返起都好自豪：「我又唔怕嘅，当自己做紧《EYT》，喺台上开心挥手，结果赢得好多掌声。」

沙姐、罗兰及戚美珍多年嚟都好照顾余毛。

邓达智邀请余毛做时装show压轴嘉宾。

15年前余毛为邓达智嘅《九龙皇帝十年回顾》做时装Show模特儿。

大姐明经常探访。

张卫健汇八万标靶药费

重提当日昏迷送院，病情危重，住院半年幸能大步槛过。余毛毫不忌讳说：「医生形容我同鲁芬病情一样系九死一生，𠵱家定期用标靶药嚟控制住病情…」天生乐观嘅余毛姐自爆经已安排好身后事：「我写晒平安纸，会捐出𠵱家住紧，一厅两房嘅旺角旧楼(30年前用几十万买落，市值大概600万)，仲会撒灰喺纪念花园。

余毛留院半年，去年4月终于出院。

医生形容她同鲁芬病情一样系九死一生。

余毛姐坚持唔惊死：「日日都死咁多人惊乜？琴姐、炳哥、我隔篱屋邻居…最重要好死，唔好有事又车返去医院，住院嗰半年唔生唔死，食唔到讲唔到嘢，如果要瞓牀，多10年命都死得喇！𠵱家做一日赚一日，有牌打有戏睇就去。」余毛姐又话活到今时今日人生冇遗憾，唯一喺4年前畀「朋友」所害，以为上广州身体检查，原来被骗去打「回春针」拍广告，唔排除系因为咁演变成大病：「唔系被害我可以平平安安咁，玩多几年安享晚年，𠵱家唔知玩得几多个月，不过都赚咗好多友情，朋友个个都对我好好，张卫健担心我冇能力负担昂贵嘅标靶药费，身在北京汇钱畀我，我问银行职员系咪8000(蚊)？佢话我睇少咗个零呀，我哋唔系合作好多，但真心好感动。」