佘詩曼催旺桃花 元宵覓良緣

（星島日報報道）佘詩曼近年可謂丁財兩旺，所拍劇集如《延禧攻略》、《鬢邊不是海棠紅》及《燕雲台》等都大受歡迎，除演技備受讚賞外，更密密搵真銀！適逢今天是元宵佳節，愛花的她自爆今年買了一棵很合眼緣的桃花，希望牛年行個「桃花運」！

向來是愛花之人的阿佘，喜歡在家擺滿鮮花，一室香氣。問到今年可有買桃花祈求行個「桃花運」？她笑說：「我今年有買呀，之前去行花市，一眼就見到一棵好靚桃花，好合眼緣就買了，承大家貴言，拍拖、買花同劇本一樣，緣分來到自然會揀到。」

阿佘坦言2020年全年受疫情影響，她跟很多人一樣心態上都有所改變，所以計畫不會想得太多太遠。「既然每方面嘅計畫都趕唔上改變，咁不如唔理，開心過好每一天，珍惜擁有的。（放一個月假期對你係好奢侈？）我好明白如果追求工作同錢係唔會有盡頭，每個人都只好去選擇適合自己嘅，工作忙咗大半年，放假放空下自己，refresh下先，好好享受同家人、朋友相聚時間對於我來講相當重要，況且新年其實真係好忙好忙，過年前又要買新衫、拖鞋、睡衣及年花；媽咪好鍾意整蘿蔔糕，會整二十、三十底，我有幫手㗎！仲有團年飯同開年飯，由於今年不能大班人相聚，只好分別同家人與朋友食，以午餐、下午茶及晚餐代替，計起來成廿幾餐，時間不夠用吖。」不過忙足整年的她，農曆新年就選擇放足整個假期，陪伴摯愛家人同好友，實行活在當下。

問到新年期間可有「發新年財」？阿佘興奮地說：「有，每年我都會爭住做莊先，通常做莊都會贏錢，今年梗係一樣，攞個好意頭。」說到今年的工作大計時，她說：「好劇本是可遇不可求，我哋唔會預計邊個角色爆出先拍；我都算是幸運，給我碰上好幾個我好喜歡角色，如果可以貪心少少，今年希望可以拍到我好喜歡的時裝劇，又或者一齣電影吧。」之前有不少粉絲們表達阿佘很久未拍過輕鬆搞笑角色，還表示最想看到《絕代商驕》及《公主嫁到》等續集。阿佘謂：「我都好鍾意呢啲角色，但要撞啱對手先有火花，（黃）子華係好正對手，有機會都希望再合作。」