Gigi被Edan叫媽咪超冧 羨煞粉絲

(星島日報報道)吳君如監製兼自演賀歲電影《闔家辣》，以搞笑形式帶出香港疫情下真實家庭故事，找來好友鄭中基及梁詠琪（Gigi）合作，還有影壇新貴呂爵安（Edan）。戲中Gigi與Edan演母子，突然成為廿幾歲仔之母，她說：「君如驚我過唔到呢個關口，所以親自送劇本畀我，等我冇得推，唔係君如提我都冇諗，其實計吓數生得出。」君如指從未見過演員如些爽快答應，又欣賞Gigi夠自然美。
Gigi今次角色既是媽媽又是一家之主，有個廢老公，夫妻相處經常拗撬，相反現實中各自對另一半都很溫柔，而君如則屬現實版一家之主，她笑言：「由細到大我都問阿女，屋企邊個係boss？佢指住我話You。我唔使做一家之主，但有啲嘢自自然然就要決定，每個人諗法唔同，價值觀唔同，好多事始終要做決定，我就做咗呢個位，因為我係媽媽。」戲中君如飾演隨和大姑奶，不乏接受檢疫及進入隔離營場面，寫實貼地。
前輩傳授戲功畀Edan
幾位前輩首次和Edan合作讚不絕口，投入得似一家人，Gigi說：「Edan一遠處就叫媽咪，好冧！我諗全香港媽咪都好想Edan嗌佢媽咪，啲fans都話好想做佢媽咪。」劇組最緊張Edan一場喊戲，君如知道他在MIRROR十二子中，覺得Edan很理性，做演員會蝕底，應該要投入忘我，還大爆：「試鏡時佢想推，就係話有場戲要喊，佢驚喊唔到好大壓力，最後都成功發揮，肯定勁過其餘11個，我哋過晒啲武功畀佢。」並激讚Edan為人真誠，有自信又謙虛。
囡囡獲封百元利是片酬
君如透露囡囡開始鍾意演戲、跳舞、唱歌，特意安排她客串1秒鏡頭做reception，給了$100元利是女兒。她明白家庭環境耳濡目染，不會阻止女兒入行，但要她真心去做才知道艱苦。鄭中基的一對子女不會追星，孻仔盡得爸爸幽默搞笑基因，他笑說：「有日學校旅行，老師聽到阿仔同同學講『I like maggie』，同學話我哋冇maggie喎，佢話maggie is sauce（指某知名調味料），maggie is very good，仲話介紹maggie畀佢識，you should try！」