姜文杰「Twosday」低調簽紙 擬約埋阿妹齊補擺酒

(星島日報報道)恭喜、恭喜，秦沛兒子姜文杰結婚了！昨日「Twosday」2022年2月22日星期二，農曆正月廿二，寓意成雙成對，姜文杰特意於昨午2時22分宣布婚訊，與女友李泳淇拉埋天窗，並上載多張婚紗照，相中二人抱着愛犬，溫馨甜蜜！
姜文杰透露疫情期間為保障大家安全，昨日沒擺酒，簽紙亦只有雙方爸爸陪同見證。至於補擺酒方面，一切等疫情過後再決定。問到疫情後會否同妹妹姜麗文一齊擺酒，熱鬧一點？他說：「哈哈哈，這個主意唔錯，可以考慮吓。」
而他在社交網發長文表示：「我們……結婚了。相戀時，您22歲，我32歲……命運安排我地拍攝相識，所以當晚嘅珍貴時光永遠記錄喺一條片入面。向來，我都唔係一個細心嘅男友……同您一齊咁多年，大部分生日飯同情人節晚餐都安在家中煮飯食，有幾次仲浪漫到歎麥記或譚仔外賣，你都冇半點怨言。講到禮物，更係少之又少。情人節我地習慣唔買玫瑰，反而年年買棵植物返屋企。情信，也從來冇寫過俾你。無論我揀邊條路，您都總會支持我……有咩諗唔通，您會陪我分析同傾訴……我有錯，您亦從來唔會怪責我……反而陪我一齊面對同正視生活上遇到既種種難題……喺一啲最難捱過嘅夜晚，你會扶持我，俾我感覺到你會一直陪我身邊支持我。作為我女友，呢幾年黎，辛苦了。」
他續說：「我相信，一段美好嘅婚姻，最幸福既莫過於日日都同自己Best Friend一齊面對人生各種喜怒哀樂。我好幸福，因為我嘅Best Friend就係您。多謝您屋企人對我嘅包容同埋接納。我會好好對待老婆，好好照顧、守護，同埋珍惜同老婆一齊既每一段時光，我也愛您地每一位。」他亦先後多謝爸爸、媽媽、妹妹等家族每位成員的愛，表示今後會擔起一家之主責任。
Paul哥讚新抱滿分
Paul哥見證兒子姜文杰註冊結婚，他受訪時表示：「心情當然開心，前一晚瞓得好好，有人代我管教個仔。註冊過程好順利，我都有用手機拍照，因限聚令關係，只有男女雙方的父親在場見證，儀式後沒有特別安排，各自回家。」問他是否好感動？Paul哥表示有少少，但沒有眼濕濕，反而親家較感動。至於他給新抱李泳淇（Rain）多少分？Paul哥笑說：「我得一個仔，一個新抱，無得比較，總之就滿分，阿Rain好叻又乖，而且好好學。」問是否恨抱孫？他表示要下一代自己計畫，要衡量工作、經濟及將來小朋友讀書等問題，Paul哥本身父親早離世，肩負照顧細佬妹的重任，加上照顧一對仔女已經好疲倦，他笑言玩孫就可以。至於妹妹姜麗文因昨日要開工，只能視像見證為哥哥開心，她坦言好開心，雖然因疫情未能搞婚禮，但見證哥哥簽紙一刻，感動得忍不住在錄影廠哭出來。
此外，陳美詩（Macy）亦於「Twosday」生日，她上載孖老公孫耀威齊齊舉舉起三個「V」手代表「222」的慶生合照晒恩愛。