Edan貼瞓覺黑圖焫㷫Stanley

（星島日報報道）由姜濤、Edan（呂爵安）、Stanley（邱士縉）、陳卓賢（Ian）、193（郭嘉駿）、肥仔（梁業）和張繼聰等合演的ViuTV新劇《季前賽》，前日終於煞科，向來鍾意低炒影鼻哥窿的Edan又派「福利」——晒兄弟瞓覺黑圖，而自己的睡姿就最靚仔，惟姜濤展露勝利笑容，網民猜測姜濤手上亦大量Edan黑圖才令他手下留情。
粉絲們留言表示等反擊戰，張繼聰未幾即留言宣戰：「咁就得啦，我都大把相。」昨日坐言起行出手，先晒一張各人拎香檳的煞科大合照，分享拍劇感受，其後晒Edan瞓覺圖還擊，不過相中Edan 依然靚仔，他更以幼雀稱呼Edan：「幼雀，你睇阿叔幾錫住你吖？影到你瞓着都咁靚仔，算係咁啦，以德報怨吖，咪叫成熟囉」。Edan未驚過，得戚回覆：「緊係以德報怨啦！因為我叫啊德（劇中角色） 」Stanley則發動攻勢謂：「一人一張呂爵安黑圖計畫正式開始！」阿聰表示等睇表演。