盧倩儀勁崇拜吳君如

（星島日報報道）盧倩儀（Shirley）是一位模特兒，曾於2019年為ViuTV節目《晚吹─Close噏》做「啤酒妹」後開始受注目。美國網站TC Candler每年舉行「全球百大俊男美女」選舉，Shirley 亦在新一輪入圍名單當中。社交平台有4.6萬追蹤者，一年內接拍了逾80個廣告，是新一代廣告商寵兒。現時除了忙於拍廣告，Shirley亦不忘增值自己，跟老師學唱歌及演戲，為自己的夢想鋪路。
如今能夠成為「廣告小天后」，一路走來確實不容易，Shirley憶述從前在模特兒公司的日子：「當時加入的模特兒公司屬於比較多外國人那一種，透過公司cast咗第23次才成功獲得第一個廣告工作機會。」現在沒有公司後台，Shirley所有公事一律自己親力親為，在2020-2021年逆市期間，接拍多達80多個廣告，但Shirley表示所賺的仍未夠付首期：「可能因為疫情關係，好多時公司都會壓價，但係我都會照接，因為都係機會嘛！有啲糧到現在依然未追晒。」不要看她嬌滴滴的形象，身為家中長女的Shirley很獨立，坦言目標希望能夠照顧家人。
Edan鏡頭前後都好搞笑
上年拍攝保險公司廣告有機會和吳君如及MIRROR成員呂爵安（Edan）合作，Shirley表示：「我本來就好鍾意睇吳君如做戲，佢嘅演技我係勁崇拜，所以未見佢之前覺得好緊張、好激動。我驚自己有地方做得唔夠好，會拖慢拍攝進度。但去到現場感覺到佢好精益求精，佢會話畀我知應該點做會比較合適，我覺得君如姐真係一個好好嘅前輩。」「至於Edan，佢鏡頭前後都好搞笑，記得拍攝時我轉身背向咗鏡頭，佢馬上提我轉返去鏡頭嗰邊，如果唔係咪蝕咗囉！我即刻覺得有道理！」對於被指貌似陳慧琳，問到Shirley會否介意被標籤，Shirley馬上笑說：「當然唔介意，直情係開心啦！我覺得對我來講係賺咗，陳慧琳係天后，而且佢又咁靚。」