馬明攬靚湯睇日落 網民估好事近

（星島日報報道）48歲的馬國明（馬明）於2020年6月公開認愛35歲的湯洛雯（靚湯），「湯馬戀」至今兩年一直甜度爆燈，網民多次向二人催婚，而屢傅婚訊的靚湯亦已被公認是「馬太」。昨日靚湯冷不防突擊社交網「派糖」，分享被男友馬明從後抱抱、齊睇日落的浪漫合照，閃爆洗版。
靚湯昨日突然在社交網上載拍拖睇日落的放閃照，並以心形表情符號示愛，相中她孖馬明一齊浪漫睇日落，更被男友從後抱抱，二人還合力做出「心心相印」手勢，照片雖然背光、拍得很暗，但甜蜜程度卻令網民齊嗌閃爆雙眼。
馬明的好兄弟黃嘉樂亦秒速留言讚二人Sweet，蔡思貝更留言：「唯一的愛，平靜的愛，熱烈的愛。」而有網民猜測馬明和靚湯是否準備宣布好消息，本報昨日聯絡馬明，他以短訊連貼五個爆笑表情符號回覆：「不如，你問佢（靚湯）啦……佢post嘅……」而靚湯則覺得是大家太敏感，並澄清：「唔係呀！唔好次次都聯想結婚啦。純粹好耐冇影相，post下相啫！」靚湯又透露這張靚相是由高海寧操刀拍攝，當日他們一班朋友出海玩，她續稱：「張相高Ling影㗎，難得捕捉到Magic hour，好靚先分享吓啫。」
遭冒認社交網呃錢
此外，靚湯也在社交網限時動態透露最近遭冒認開假社交網借錢，呼籲網民小心中招，她發文表示：「有朋友告訴我facebook上有冒充我的帳號周圍問人借錢，有必要澄清一下，我facebook冇個人帳戶，只有一個fans page，而且我所有social media帳戶都係有認證，所以大家要小心小心。」