李佳芯靠靚 逆轉炮灰檔收視

（星島日報報道）李佳芯主演的劇集《有種好男人》被形容在「炮灰檔期」播出，但首周收視達22.6點，被指撐起劇集逆轉勝的李佳芯，謙稱是整個劇組功勞，更感謝幕後將她影得靚，才會有觀眾讚賞。而陳自瑤日前以性感靚相迎接新一年，笑言可考慮出寫真。
李佳芯（Ali）、陳自瑤（Yoyo）、胡諾言及趙希洛等昨日到觀塘出席劇集《有種好男人》宣傳活動，講到劇中有胡諾言做閨密，Ali表示好羨慕：「我都好想有閨密，可以兩姊妹咁一齊玩、一齊瞓，我都有朋友和知己可以講心事，但仲未可以做乜都一齊，而男閨密更加無。」
笑海棠春睡似鹹片
對於劇集被指在「炮灰檔期」開播但贏得22.6點收視，Ali表示收視沒有輸贏，「炮灰檔期這個講法我都是第一次聽，節日一家大細睇得開心就是好安排。（觀眾指靠你撐起成套劇？）唔可以咁講，是全部人的功勞，我睇套劇都拍得好靚，懷疑是監製落了柯打，拍攝過程好似拍廣告咁，啲場景有反光紙圍住，證明幕後團隊都好努力。（仲讚你海棠春睡好靚、Keep得好好！）海棠春睡？講到我拍鹹片咁，黐綫㗎？我是盡力Keep得好，想貼近我『真實年齡』28歲，哈哈！其實狀態最重要是睇心態，工作與生活可以平衡。」
只求靚相唔會慳住
同場的Yoyo以運動背心搶鏡，她笑言穿着是配合打War Game，提到她日前在社交網的一輯靚相亦很性感，她笑言：「新一年有新開始，所以用自己鍾意的方式去影，自己一路以來都影落唔少相，新一年要用靚相去開始。其實輯相有着衫，大家睇第三張相就知，並不是穿崩，只是影一個感覺。其實很多外國潮流雜誌都有這種感覺的相片，可以是唯美感。」講到照片美得可出寫真，Yoyo笑問有沒有人會想睇？她說：「我入行前都是做模特兒，有時演員未必演到想做的角色，咁生活上可以影輯鍾意的相、着不同的衫、擺不同甫士，演繹不同的自己，可以野性些。（出寫真？）等我諗吓。（邊個操刀影相？）其實很多相都是請攝影師影，還有造型師、燈光師。（咁咪好大使費？）靚就得！（再性感些、影輯老公視覺？）是自己視覺，有好多相未出，是感覺上的性感。」