193：最想幫肥仔執造型

（星島日報報道）熱愛時裝的193(郭嘉駿)獲公司度身訂造時裝真人騷《Fashion Killer》，他驚歎節目的參賽者有不少「臥虎藏龍」，當中有一位曾經是梅艷芳的造型師，令他拍完節目後有很深反思，發現自己對時裝的認識很表面。
今次的真人騷共有15集，193與與拍檔李炘頤（Alina）除了在節目中擔任主持外，亦有份揀選入圍的參賽者，而參賽者則會為星級嘉賓設計形象。今次請來的星級嘉賓陣容超勁，又爆有嘉賓因「揀衫揀到喊」，不過Alina指最難忘的是因中招停工而跟偶像緣慳一面：「一直好期待，點知拍前兩、三日中咗，超Sad！」
193透露今次參賽者有很多不同類型的人，其中一位前輩級的參賽者Peter仔，以前更曾幫梅姐襯衫，故也乘機向對方偷師：「我哋淨係識睇而家咩係靚，但佢係另一個層面，佢真係講經咁講番好多時裝歷史，有啲資料google都未必搵到，所以都唔係好敢批評，有一集題目講2000年代，兩位前輩同其他參賽者睇嘅嘢好唔同，都令我反思好多。」
欣賞Wyman衣着
問到193覺得娛樂圈中誰人着衫着得最好睇，他認為是黃偉文（Wyman），又自爆早前向Wyman示愛，告訴對方因他而愛上一個服裝品牌，而該品牌因稍後將會結束，故193早前拍攝《越州公路193》MV時，特意全部穿上該品牌的服裝來拍攝。而鄭裕玲在MV中戴的帽，也是出自參賽者寶珠的作品，笑指他借節目「自肥」，193坦然承認，不過同時亦希望能幫參賽者入行，亦期望節目可為時裝界帶出新氣象。
193笑言在娛圈中最想幫肥仔執造型，很想借服裝去幫佢拉長身高：「要佢着闊褲遮鞋，然後再加好多鞋墊，以後ERROR就一樣咁高，至於阿Dee同保錡身形正常唔難搞。」雖然現時已成為潮流達人，但193坦言以前也發生過不少時裝車禍：「Janice Man年代，戴貨車帽戴得好高，又試過戴白色膠框同木製眼鏡，仲有條爛牛仔褲，好似冇錢買褲嗰啲，而家睇番好娘，但以前真係超潮。」