蔣家旻戴祖儀 鬥嘴互窒放笑彈

（星島日報報道）蔣家旻與戴祖儀齊齊亮相TVB《做節必食18道菜》，2人在節目中挑戰廚藝，更在廚房中鬥嘴互窒大發笑彈，至於廚藝了得的譚俊彥分享入廚心得最緊要慢！
戴祖儀與蔣家旻在節目中瘋狂互窒，當二人入廚幫手撻蝦膠時，雖然手勢同樣麻麻，但仍有「閒情」鬥嘴，先是祖儀發動攻勢：「睇嚟我哋都係同一類人喎。」家旻即反擊說：「我覺得我撻得好過你少少。」祖儀即還拖：「五十步笑百步！」
之後眾人試食「脆皮鹽香雞」時，家旻抵受不住誘惑地自爆：「平時食雞我唔食雞皮，今次我要連埋雞皮同瑤柱一齊食。」祖儀聞言再「發功」：「平時唔食雞皮？你實在太過分！」家旻則扮惡「睥住」祖儀，場面搞笑。隨後兩女連同江嘉敏一起品嘗材料豐富的「八仙過海」，三人更爭食鮑魚、金蠔及花膠等名貴食材，氣氛熱鬧兼嘈到拆天！
譚俊彥大晒廚藝
至於已達神級廚藝的視帝譚俊彥(Shaun)，今次再大顯功架示範處理龍蝦， Shaun有姿勢兼有實際，師傅見狀都忍不住大讚他專業，Shaun事後笑言：「煮嘢食最緊要慢慢嚟，唔可以太心急，一心急就唔好食！」而曾在外地留學的他，笑指以往每逢新年都會與一班同學於中餐館食飯慶祝：「一食麵就會諗到嗰句，『除咗食麵之外，係想見多大家幾面』，新年大家聚埋一齊時，會特別掛住屋企人。」