梁詠琪問心無愧：已盡最大努力

（星島日報報道）一連三場梁詠琪（Gigi）「時間遇上我們演唱會」前晚於紅館舉行尾場，商台DJ梁文禮睇完Gigi演出後在社交網讚她靚，卻被揭原來背後在私人社交帳號狂踩整個騷，遭網民斥雙面人。Gigi在騷後坦承有進步空間。梁文禮昨日開咪做節目前公開道歉，並指Gigi有6呎高應該比一般人大量。
梁詠琪前晚完騷後受訪，身材fit爆的她指現時55公斤，為開騷瘦了6公斤，在兩個月前進行身材管理，現時體重已回到結婚時，她自爆落台時被女兒投訴點解多謝爸爸而沒多謝她，Gigi解釋家人已包括她，她又透露暫沒計畫開part 2，但亦很想再唱。
親自邀請Edan做嘉賓

對於MIRROR成員呂爵安自去年7月後首次重踏紅館，原來是Gigi親自邀請對方：「我一直好想同冇合作過嘅人合作，所以即刻諗起Edan，我一直有同佢保持聯絡，我冇諗過呢個問題（重踏紅館），佢都好好，一口答應我。」

對於有指梁文禮在私人社交帳號狂踩演唱會，Gigi表示不要緊：「一套電影，有時都有好同唔好的評價，我覺得唔緊要，最緊要我喺當中盡咗最大努力，每個意見我都會接受，的而且確我認為自己仲有好大進步空間，我會不斷力求進步。」問她可覺得梁文禮是「雙面人」？Gigi說：「我冇睇，私下亦唔係好認識，所以我覺得唔使理會咁多嘢，做好自己本分同眼前工作就夠。（認清一個人？）我覺得唔係好關我事。」
「只係一個普通人批評」

演唱會出品人陳家倫則反問梁文禮是否很出名？得知對方是DJ後，寸爆對方：「佢係咪對時裝好有研究？唔係吖嘛，對音樂好有研究？咁如果佢唔係呢兩瓣翹楚，只係一個普通人去批評或者畀啲意見就由得佢，佢講嘢係有自由，佢鍾意點講就點講，一個普通人我唔想回應佢講嘅嘢。（即唔當一回事？）Nothing！」他又指不知那個帳號是否真屬於梁文禮，並謂就算普通人也可給意見及批評，演唱會好與壞讓觀眾去衡量。

梁文禮昨日亦在電台花了很長的時間解釋及道欺，他提到「我同梁詠琪、演唱會團隊以及買飛入場嘅觀眾，講聲唔好意思，亦都對唔住，自己睇完第一晚後好肉緊……亦有少少自己意見，傳媒就話狠批梁詠琪演唱會咁樣，我都希望呢個回應，大家可以接受﹗同埋我冇機會聯絡到梁詠琪本人，冇佢電話或聯絡方法，我透過Vani傳咗好大段文字畀梁詠琪，希望佢可以接受我嘅道歉啦！我有話畀佢知，點解我咁肉緊表達我對呢個騷意見，希望佢可以消化，希望嚟緊Gigi有新歌、有新演唱會嚟到《叱咤樂壇》呢到﹗」

梁詠琪經理人就梁文禮昨日致歉表示：「Gigi剛完成演唱會，我讓她這幾天在家好好休息。事情就讓它告一段落吧！謝謝外界對演唱會的好評，整個團隊都很振奮，Gigi也在不斷力求進步，大家有目共睹，大家都放低向前行吧。」
鄭秀文自爆唔敢穿波鞋

Gigi前晚邀鄭秀文（Sammi）擔任嘉賓，Sammi表示專誠為Gigi以「黑白雙煞」造型現身，獲Gigi讚認真，就算做嘉賓也特別穿高踭鞋，Sammi即笑說：「唔通着波鞋、矮你3個頭？」兩人合唱《我們都是這樣長大的》，Sammi興奮走到台邊遞咪給歌迷合唱。最後一眾Fans大叫安歌，Gigi兩度重回舞台並笑說：「最唔捨得走嘅其實係我！」前晚Gigi媽媽、老公Sergio及女兒Sofia齊捧場，還吸引台灣男星王大陸攜「大馬女神」女友蔡卓宜，周秀娜、鄭融、蘇玉華、湯怡及泳兒等撐場。