Gin Lee勁歌熱舞跳到腳軟

（星島日報報道）李幸倪（Gin Lee）昨日到沙田馬場擔任表演嘉賓，身穿閃爆Bra Top現身的她一連跳唱出《Dum Dum》、《IDK》及《喘息空間》，笑言上次連續唱跳3首歌已是2018年紅館開騷的事情，而且今次的舞蹈更強勁，所以對她來說是新挑戰，又自爆剛才跳舞太用力搞到腳軟：「朝早有食嘢，但因為食完嘢啲衫會脹，所以只係食少少，不過就唔夠，如果再有機會，下次試吓再早啲起身食多少少，今次算係攞個經驗。」
此外，她笑言表演完可放下心頭大石食番餐，由於近日一直練舞，搞到身體酸痛，所以希望有時間揼骨放鬆。至於賭運方面，Gin透露平時都有橫財運，曾試過隨便說幾個號碼給朋友即中獎，但因為太大壓力，所以之後朋友再問已不會再講，而昨日則嘗試落注，試一下運氣。