張玉珊認愛盧啟賢 激讚廿四孝好爸爸

（星島日報報道）張玉珊自幕前引退從商後，身邊一直不乏追求者，但事業大過天的她多年來感情生活一直空白。最近有綫人向本報爆料，指在意大利甄子丹、汪詩詩舉行結婚20周年婚禮的現場，目睹張玉珊與一位型男過從甚密，兩人糖黐豆般形影不離，更有拖手摟腰等親密舉動。經過記者進一步查證後，發現男方為一間人壽保險公司的行政總裁盧啟賢，但最近卻被某媒體指控其誇大身家。
本報就此特意致電張玉珊求證，她首先大方認愛：「係呀，我哋係喺疫情期間經一位朋友介紹認識嘅。可能我哋大家都係做生意嘅，所以都好多共同話題，而且三觀都好吻合。佢最吸引我係份人好孝順，對佢個囡囡又好好，係一個廿四孝爸爸，而且對自己嘅事業好專注、好有要求，最重要係佢好Gentleman好識照顧我。我哋𠵱家感情都好好，多謝大家關心。」
記者繼而問到最近有關男方的負面報道，張玉珊表示：「其實我覺得呢單根本就係公關災難啦，佢外國公司同事當佢係Marketing material，英國公關公司當佢提款機，做一次撳一次錢。佢梗係對嗰個記者唔夠nice，隻眼擘得唔夠大，人哋覺得佢唔夠友善，如果唔係點會咁多人唔寫去寫佢？呢個年代一支筆就可以寫死佢。不過食得鹹魚抵得渴，佢做高端財富管理，點樣都要保護自己嘅客戶，咁佢自己哽咗佢啦！對我嚟講你哋寫佢100億同10幾億身家，最好個數目講得愈少愈好啦！有都最好唔好認，你哋20年嚟問我身家，我從來都無答過啦！」
為男友搵傳媒晦氣
其後張玉珊補充：「其實我都認識寫佢嗰位傳媒老闆，事後我都有搵佢晦氣，我叫佢一係介紹另一個男朋友俾我，一係話我知點解咁多人唔寫要寫佢？佢話『你男朋友對啲傳媒唔夠nice，加上英國公關公司做得太差，我都管唔到我啲同事！Sorry！』」
自嘲灰姑娘變花木蘭
至於為何不主動向外公開戀情，張玉珊表示：「我不嬲都唔講呢啲嘢嘅啦，只係希望唔好燒到其他無辜嘅女仔。作為女朋友，我本來都想灰姑娘着玻璃鞋出場，𠵱家變咗花木蘭出場都OK吖，哈哈！」