曾志偉斥假新聞害人：搵到源頭一定告

電視廣播有限公司總經理曾志偉上月於台灣完成動脈瘤微創手術，期間傳出他離開TVB的傳聞，近日內地網上更瘋傳他入股緬北詐騙集團，正被香港執法機關調查。在台灣休養超過兩星期的志偉昨日回港親自回應，表示以上傳聞均是假新聞。
志偉昨日乘飛機由台北返港，下午約4點，他精神奕奕地推着行李箱步出入境大堂，全程笑容滿面。志偉受訪時首先講到健康情況，表示：「好多謝大家關心，一路進度良好，手術好成功順利，住了5、6日醫院，然後出院便等覆診，前日再做全身檢查，醫生非常滿意，說情況靚仔、可以返香港。」問是否一早預計會做手術？志偉表示：「係，醫生觀察十幾年，條血管漲咗要睇住，否則會有危險，疫情3年無檢查，發現血管漲了要做手術，明年再覆診。（不做手術有危險？）唔做就唔使做！穿咗會冇得救，冇得避，是必須要做，醫生朋友都建議做。」問是否將復工？志偉指會透過視訊交代工作、減少工作量，至於可會轉崗位？他笑問是否守道具組或化妝組，更否認離職：「交咗幾封信但彈返轉頭！（向同事派定心丸話自己有排做？）會叫佢哋孭重些、我輕些。」
提到近日涉詐騙集團的傳聞，志偉說：「最憎呃老人家錢，仲話拉咗我？我都仲係台灣！如果是藝人身份我都不回應，但有職位在身一定要處理，所以出聲明回應。其實不止這行業，假新聞害到好多人，甚至搞到小朋友自殺，佢哋整幾張相好容易，但就會影響人一生。所以假新聞會害好多人、大家唔好亂信，整假新聞的人都要問良心點解要咁做，三思三思！（採取法律行動？）之前發聲明，𠵱家涉及詐騙同犯罪，會搵源頭查根究柢，一定會告。」
「靚仔未必做到司儀」
至於港姐決賽當晚四位司儀陳山聰、陳豪、陳展鵬及蕭正楠的表現被指是「災難級」，志偉笑言：「我有睇，安排四位視帝，唔可以話災難級，證明靚仔未必做到司儀，不過都知佢哋太忙，我都有講加油，想畀大家新鮮感，唔好只睇我和C君這些甩頭甩骨、靚仔有靚仔的好，睇大家鍾意睇乜，出年再諗過！」