劉永認唔識珍惜前妻黎燕珊

因為一宗「買樓慘墮騙案」，令70年代邵氏當紅小生、李小龍嫡系弟子的劉永再活躍於人前。72歲的劉永接受《星島頭條》訪問，罕有談及過去的3段婚姻，包括與首任妻子戴良純的關係、與第二任妻子黎燕珊離婚原因，並透露與第三任妻子黃麗燕原來仍未離婚。
劉永的三段婚姻都先後分手收場，有指因其火爆性格所導致，曾被形容為「家暴男」的劉永淡淡地說：「𠵱家老咗先講，黎燕珊都知道，我真係唔會打女人，我又唔飲酒，點會家暴？我同黎燕珊離婚，完全係因為媾女，我都唔知開咗個電話，畀佢成個鐘頭聽到我喺度媾女，係衰嘅，一個咁嘅老婆，真係衰！」
2007年劉永與比他年輕30歲的內地女子黃麗燕結婚，並育有2名兒子，可惜兩人因年齡差距較大而出現代溝，最終在2019年分開。回復單身的劉永首要重新學習如何做爸爸：「我70年都未湊過仔，未入過廚房，𠵱家我識煮飯、煲湯，邊個話淨係得女人識煮？縫針縫線我叻過你，唔識咪學！」為了令兒子早日適應，他不惜變身為「伴讀書僮」，笑言以前只覺得拍嘢辛苦，原來在屋企都唔簡單！至於和第三任太太的關係，他承認最初確實不愉快，近年睇開，因為大家並非仇人：「我哋冇離婚，星期六、日畀佢哋見吓面，唔會冇媽媽，只係兩個大人唔可以一齊生活。」更表示兩公婆年紀差距大，想法不一樣，緣份盡了就算，亦多次強調沒心情諗女人，當下最錫兩個仔。
專心湊仔唔再諗女人
回望過去，劉永有感而發：「第一個好似搏命，乜都唔諗，嗰陣諗住掟啲刀叉兜口兜面整花咗你，冇人要你，只有老公愛你，咪返嚟我度，點知原來仲衰；之後同阿珊一齊，點知『好咗傷疤唔知痛』，咁好嘅老婆唔識珍惜。老咗到𠵱家嗰個，初初諗住係一齊到老，仲生咗兩個仔，係佢要走，不過唔緊要，反正我都諗住退休，咪專心湊仔。」更不否認目前經歷的一切全是「因果」：「我成日都同自己講，衰仔，有幾耐風流就有幾耐折墮，總之我𠵱家剩係諗同啲仔去邊度玩，7字頭開心咪得，擺晒精神喺兩個仔度，仲搞咁多仲乜？」