Edan澳洲拍團綜 最驚跳降傘

呂爵安（Edan）前晚出席品牌活動，吸引大批粉絲到場支持。Edan透露將到澳洲拍團綜，因本身畏高，所以怕跳降傘。被問及想跟誰人同房時，Edan笑言會揀阿Jer，因為可以一起打機。
MIRROR成員呂爵安（Edan）、林峯、蔡卓妍（阿Sa）、朱鑑然及吳肇軒前晚出席品牌活動，過百「雀屎」（Edan粉絲暱稱）到場支持偶像。林峯出場時，在場「雀屎」合唱其經典歌《愛不疚》歡迎他，相當爆笑。對於獲「雀屎」唱歌歡迎，林峯說：「我好快有新歌喇！好感動。」Edan也表示小時候有聽林峯的歌，「佢首《Chok》都好出名，中學表演都有唱佢啲歌，佢唱歌真係好聽。」
未聞阿妹被罵
MIRROR成員將合體到澳洲拍團綜，Edan表示期待又緊張，因本身畏高，但當地出名跳降傘，不過好開心一班人住大屋。問到想跟那位成員同房？他說：「無所謂！我單獨住都得，真係要揀一個就揀Jer，因大家喜歡打機。（唔使瞓？）聽聞要好早起身。（唔想同邊個同房？）Anson Lo（盧瀚霆）好大鼻鼾，講笑！」提到在演唱會疑擺姜濤上枱，惹「姜糖」（姜濤粉絲暱稱）不滿，連累胞妹無辜被罵，Edan坦言未有聽聞，認為haters有不滿是不能控制，大家明白就會明白，他不想太多負能量，「我阿妹心臟強大，我成日話佢肥。（妹妹EQ高過你？）EQ都好，自細阿媽教導出嚟，我哋EQ好好。」
有指新歌MV網上點擊有近九成「dislike」數字，疑haters所為，Edan說：「我唔會好在意，如果首歌好多人dislike，應該會收到好多人同我講好差，但又收唔到。我一笑置之，唔會影響到我，出首歌原意唔係要好多like。」
禁囡囡任巡唱嘉賓
林峯透露早前在大馬拍新劇《家族榮耀之繼承者》，稍後在香港拍兩星期，10月返內地拍電影，明年下半年籌備巡唱，亦期待開拍電影《神探2》。提到太太張馨月帶囡囡到大馬探班大受歡迎，林峯笑指囡囡性格活潑兼不怕醜，不認為太太帶囡囡探班會影響拍攝，「囡囡依家讀K1，讀書方面由老婆幫佢搞，依家功課越嚟越難，家長都跟唔到，幼稚園功課都應付到。我有幫囡囡揀學校，好多我去籌備。」林峯表示囡囡喜歡跳舞，現居住上海，待囡囡長大一點才安排上堂。會否讓囡囡任巡唱嘉賓？林峯即說可以睇騷，但不會上台。
被爆跟富三代男友石恆聰（Anthony）分手的阿Sa，在活動前已表明不接受訪問，估計避談分手一事，但她面帶笑容亮相，似乎心情不錯。