馬明遭靚湯訓話：唔准講婚期

TVB新劇《飛常日誌》昨日在機場舉行開鏡拜神儀式，馬國明（馬明）及蔡思貝等主要演員齊出席。有指馬明被公司急召開劇而影響婚期，他昨日澄清所有照原定並沒押後，但自爆在拍攝尾段會有事發生，惟他拒透露是否影婚照，笑言被「訓話」，要等湯洛雯批准才可以講。
有指《飛》是《衝上雲霄III》，出席開鏡的主角馬國明否認，並指今次以機場管理為背景，且只得十集。提到今次TVB急召馬明開劇，搞到影響他與湯洛雯（靚湯）的婚期，馬明就指不知道是否急召，但沒有因此劇影響婚禮事宜，所有事情會按照原先安排進行。馬明更自爆拍攝此劇的尾聲階段會有事情發生，問到是否與靚湯影婚紗相？他說：「嗯，我成日都被人『訓話』，所以要等阿湯批准我先講得，因為佢想保持神秘感，我唔可以再講。（有咩你可以決定？）着嘅禮服可以自己揀。」蔡思貝亦指聽到好友靚湯的婚訊亦替對方開心，至於會否做姊妹及是否已收到囍帖？她亦笑指要問阿湯。
恭喜黃心穎結婚
馬明與思貝首次拍檔演出亦有甜蜜戲份，劇中思貝是馬明前妻，提到有網民不想看思貝演出，她聽後即說：「唔係第一日嘅事，冇乜所謂，鍾意睇就睇。」馬明亦說每個演員也有人喜歡和不喜歡，做好自己就可以：「《你好，我的大夫》收視都好好，我都有睇。」另外，提到馬明舊愛黃心穎結婚，他說：「恭喜，有朋友結婚當然好開心啦！（傳佢雙喜臨門？）我唔知，都恭喜啦，無論一個喜定兩個喜，都恭喜！」
劇中陳豪（阿Mo）客串演機場管理局主席，只有一場戲，但他已感到興奮，因是難得的製作。今次不扮演飛機師，他表示小朋友會感失望，現時他正在拍攝《企業強人》，稍後會到深圳拍攝至年底，希望可以在聖誕前完工返港，跟小朋友過聖誕，而老婆陳茵媺也會帶小朋友去深圳探班。問到會否趁拍《飛常日誌》帶小朋友到機場參觀？阿Mo大笑說：「我都抱住興奮心情，但係問咗監製原來嗰場戲喺酒店拍，連機場禁區都入唔到。」
劉穎鏇圓空姐夢
劉穎鏇昨日身穿空姐制服現身，她表示自小已喜歡看《衝上雲霄》，也曾經幻想過自己是否有機會扮空姐，很開心今次能如願。「細個真係有考慮做空姐，因為可以周圍飛，唔使買機票就可以環遊世界，不過大個就唔鍾意坐飛機，因為好怕氣流，所以現時都好怕玩過山車。」問是否想在機場開工認識機師？劉穎鏇表示有點困難，因拍攝要周圍走，而禁區範圍也有限制，不過她笑言見真的空姐時有融入其中的感覺，而她也期待之後拍攝會踏足不同的景點。