AK獲婆婆撐場感觸哽咽 IanSon分享5年兄弟情

  MIRROR於亞博舉行的《MIRROR FEEL THE PASSION CONCERT TOUR 2024》已進入倒數階段，前晚（31日）舉行的第14場彩蛋有「IanSon」Ian（陳卓賢）和Anson Kong（江𤒹生），兩人大談兄弟情，而AK的婆婆亦有到場支持，當談到婆婆記憶力漸差時，AK更一度感觸哽咽。
甫出場，Ian即笑指他和AK這對組合很易估中，兩人又分享多年來的兄弟情，AK透露大家各自推出solo歌後就各有各忙，被質疑感情不如以前，Ian即說：「絕對唔使質疑，事實唔係真係咁friend。」AK表示粉絲會猜測兩人的感情覺得好搞笑，並搞gag謂：「因為感情呢啲嘢係兩個人嘅事。」Ian即耍手擰頭表示拒絕，場面搞笑。AK又指網民經常猜測12子之間的感情是無謂的想法，他們都很開心，5年之後仍然可以一齊開演唱會，唱歌給大家聽。
Ian趁休息去打golf
另外，AK透露他的婆婆和媽媽亦有到場支持，並感觸表示：「我對上一次見婆婆已經係MIRROR 5年前第一次開演唱會嘅時候，相隔5年，婆婆開始年紀大，記性唔係咁好，好開心婆婆可以見證呢個咁開心嘅時刻。」AK一度哽咽，Ian即窩心去遞上紙巾，最後IanSon合唱《DWBF》，其間兩人攬腰又搭膊頭，盡顯兄弟情。昨日是MIRROR休息日，Ian在網上分享了打高爾夫球的相片。