志偉開心「LOONG 9」成熱話：𠵱家個個都識

TVB《亞洲超星團》出線學員正式成團並取名「LOONG 9」，但團名就引起熱話，高層曾志偉昨日（15日）出席《俠之大者-金庸百年誕辰紀念》揭幕禮，笑指「LOONG 9」被網民抽水，有更多人討論，炒熱令個個都認識就更好。
志偉覺得團名不是問題，「好多名大家最初唔習慣，但係咁就炒咗個熱度，𠵱家個個都識，冇人唔識LOONG 9。個名係北京用，佢哋唔明白LOONG 9變廣東話係乜，對我來講，呢啲嘢自己見得多，慣吓慣吓就舒服，如果呢班人成績公認，大家或會覺得呢個名改得好，人生就係咁。」志偉憶當年成龍拍《警察故事》經常被鬧戲名似沒用腦改，結果該片賣錢拍第二、三集，又舉例《A計劃》、《恭喜發財》、《聖誕快樂》這些名字讓大家最易認識，名字深奧反而大家難記得。
唔怕網民抽水：仲好！
談到團名被網民抽水，志偉直說：「仲好！多啲人討論同認識。有人唔知呢隊係咩都翻資料睇，年紀大的朋友冇睇《亞洲超星團》都知好多熱話。」問他有否參與構思團名？志偉指是北京方面負責構思，當然有給他們過目，坦言最初都覺得奇怪，「就由得奇怪囉，𠵱家大家都識。昨日、今日訪問都被問，之後有排問，問問吓就慣。」
對於阮民安（Tommy）重提當年組合E-kids原本改名A4，志偉說：「好多人唔記得佢，𠵱家想人記得吓佢。當年我哋提拔唔少新人……呢個世代大家想炒熱返，冇任何嘢係錯與對。之前《東方魅力》都被人話改得唔好，難讀又難寫，但改咗就改咗，任何嘢毋須追究，已係歷史。」談到金庸著作，志偉稱TVB將播放騰訊的新版《射雕英雄傳》，指騰訊擁有金庸和古龍的版權，近日與騰訊開會談可否讓他們重拍經典著作。
肯為英皇電影「裸跑」
另外，志偉和恬妞等前晚出席英皇電影《出租家人》慈善放映場，為「福幼基金會」籌得40萬善款，「福幼」創辦人兼主席志偉開心感謝各位善長，問到票房高會如何報答觀眾，他玩食字表示要「裸跑」，「攞個心出嚟跑！」恬妞表示要謝票謝到5,000萬才離港，志偉即謂如有5,000萬票房，裸跑無所謂。