盧瀚霆 捧獎不自滿繼續200%努力

盧瀚霆連續第3年奪得「年度男歌手」，並同時獲得另外兩個大獎成為前晚的大贏家。陳卓賢雖然失落「年度唱作歌手獎」，但笑指自己仍是唱作人，不會因為失獎就不是唱作人。而臨時新加設的「MOOV大數據至尊歌手獎」，令人感到是為姜濤而設？惟姜濤表示沒考慮過這一點，有任何獎項已是好好的肯定。
盧瀚霆（Anson Lo）連續三年奪得「年度男歌手獎」，並包辦「年度流行歌曲獎」和「年度跳唱歌曲獎」成為大贏家，他多謝投票支持他的粉絲和觀眾，並說：「開心啦，每年冇話要連續定唔連續（得獎），因為每年變化好大，有得攞獎已係bonus。」完騷後他在社交網貼出捧住三個大獎的相片並分享感受：「這一年幫助過自己的前輩師友有很多，自問今年的心理質素不是每天都好，但無悔的是，我依然十分熱愛音樂、熱愛舞台、熱愛演出；無悔的是，我依然渴望每一次都拿出自己的200%去做。」又承認每天要改善的地方都很多，但會繼續付出200%努力。
陳卓賢（Ian）雖然失落「年度唱作歌手」，他表示：「我都係唱作人。（但輸給林家謙。）冇贏輸，出歌唔係為攞獎，有獎或冇獎唔代表贏輸，大家聽我嘅歌就係最好嘅獎。唱作人依然係唱作人，唔會因為個獎而變咗唔係唱作人。（會否失望？）真係冇失望，真心冇失望。」
姜濤：有獎項就開心
至於姜濤奪得「MOOV大數據至尊歌手」，被指該獎項似為他而設？姜濤說：「冇考慮到呢點，有任何獎項已係好好嘅肯定，冇特別諗呢個獎係點樣一個獎項，只要有獎項就好開心。」
奪得「年度新人男歌手獎」的邱士縉（Stanley）說：「多謝粉絲，相信我冇13萬個粉絲，多謝其他鏡粉同鍾意首歌的朋友。（會不會是因為演唱會一脫成名？）脫了有13萬人支持咁犀利？」Edan在旁即笑言自己也要脫，望可多13萬粉絲。
AK：大家食咗飯先
另外，談到稍後舉行《Hi MIRO！見面祭》歌迷聚會，但12位成員分拆成12場，若粉絲要見齊12人費用昂貴，隊長Lokman表示《見面祭》既是MIRROR中期活動，也是為了紀念即將重建的九展，之後仍有源源不絕的MIRROR活動可參與。Lokman說：「呢句我自己講嘅，量力而為，留返下次齊人先再睇，冇可能超過自己負荷，咁樣我哋都唔想。」AK亦說：「麵包和MIRROR，推介大家揀麵包，唔好揀MIRROR，大家食咗飯先。」