AL 反擊濃妝論：又唔會傷害人

MIRROR世界巡唱最終站，一連四場《MIRROR FEEL THE PASSION CONCERT TOUR 2024．MACAU》前晚在澳門銀河綜藝館舉行尾場，全場爆滿，12子毫不留力，鏡粉不肯離場，姜濤感觸落淚。Anson Lo回應發文反擊被指濃妝，坦言好鍾意化妝也不怕落妝素顏示人，只要沒有傷害任何人就可以。

前晚台上亦有「蝦碌」，Alton做完一字馬起身時甩鞋；而12子唱《WE ALL ARE》及《One and All》時姜濤忍不住喊。彩蛋環節，12子唱《全民造星》主題曲《前傳》帶給大家回憶殺，最後唱完《Catch A Vibe》為巡唱畫上圓滿句號，全場鏡粉不肯離場，不停大叫Encore。
Alton甩鞋燒鬚

12子完騷後受訪，Lokman指巡迴到新加坡站已開始不捨，澳門場更是為倒數而感觸：「演唱會橫跨咗好長時間，到現時真係落幕，都期待下一次係幾時。」他們笑言下次最遲是10周年。完成巡唱，Alton最想按摩，其他人最想食。Stanley在社交網表示腰痛，他指因操得太勁，跳《前傳》時最後擺的甫士企不穩，「我跳跳吓好肚餓，（腰對男人嚟講好緊要？）所以要努力再操好啲。」Alton笑言第一次跳甩鞋，希望大家睇得開心，又慶幸沒着穿窿襪。

姜濤表示感冒已痊瘉，死口不認在台上喊，「感冒啫，（感冒會流淚？）我打乞嗤！」提到搶Stanley閘自貼勁肥黑圖，姜濤笑說：「將條線拉到咁高，佢就冇得貼，大家開心就得。」Jeremy跟Edan也表示有很多「大表波」沒着衫的照片，Edan更笑言手機內照片不能曝光。

早前Anson Lo被盧覓雪在電台節目開名笑濃妝，一向脾氣好的他忍不住連環出帖反擊。前晚他表示心情未受影響，出帖只想鼓勵為此事不開心的粉絲，「我好鍾意化妝，化妝係一件冇錯嘅事，經歷幾年，呢幾年收到唔同評論，我好樂意同虛心去接收所有嘢，然後再過濾。」他指最重要互相尊重，至於被讚素顏可愛，日後會否更多素顏？他坦言經常素顏，「巡唱嗰陣我經常素顏落街，鬚都唔剃，係咪覺得我驚落妝？完全唔驚，我哋之前做《12怪盜》Live時都冇人化妝，化唔化妝冇所謂，總之自己feel good，睇場合化咩妝，冇害任何人咪得囉。」AK幫口指化妝代表尊重，Anson Lo續稱：「基本尊重好緊要，言行尊重。」
Ian AK欠飛債

即將開個人騷的Ian與AK笑言要互相索取門票，直認欠不少飛債，會否考慮加場？Ian說：「唔到我哋考慮，公司考慮，現在完咗Tour就可以積極籌備，做好自己要做嘅嘢。」