孫慧雪面對老公 有口難言

一向是Minions忠實粉絲的孫慧雪（阿雪），有份為動畫《壞蛋獎門人4》聲演犀利哥的老婆Lucy一角，令她開心不已。阿雪笑言起初獲邀試音時心情興奮，礙於要簽保密協議，所以未提及關於任何配音的資訊，甚至連老公Edwin都不能透露，但竟被老公一語道破。
阿雪回想當初告知老公有機會為動畫配音，對方的即時反應令她意外，「我老公話如果搵你配音應該係犀利哥嘅老婆Lucy，佢話覺得我好似Lucy，但簽咗保密協議，我都無同佢講我為邊個角色配音。」面對過百位有份試音的競爭對手，最終阿雪被選中聲演Lucy，她收到好消息時身處日本旅行，封口到能夠公開才鬆口氣。
代入媽媽心情
原來當年阿雪跟老公第一年拍拖時，對方首度為她搞生日會送上Minions蛋糕，奪取芳心，「女仔好易𠱁，就咁被人𠱁咗！嗰時都猶豫同唔同呢個男仔好呢？但佢拎出Minions蛋糕，真係好開心！」首次挑戰聲演動畫角色，阿雪直言有難度，角色說話好快又變化大，但有保密協議，不能在家練習對白，只能到錄音室即日睇稿夾口形，比演戲更緊張，角色也是媽媽，阿雪好多時用媽媽的心情，更易入戲。
TVB是少林寺
離開TVB後，阿雪工作多多，最近更參與ViuTV真人騷《美麗40路》，踏入4字頭的她還有很多想嘗試，「TVB係一個少林寺，做路人甲乙丙都學緊嘢，遇上好多前輩對手，要捱得！而家好幫到我，做真人騷好長時間一早到晚，打醒十二分精神知發生乜事，係多年來儲返來的經驗。」