洪嘉豪自爆身邊勁多「小新」

洪嘉豪首次挑戰配音，為動畫電影《蠟筆小新：我們的恐龍日記》聲演熱血青年比利一角，他坦言《蠟筆小新》陪伴不同年代的人成長，今次聲演可謂一個挑戰，更自爆細個匿入洗手間睇漫畫的趣事。

從未試過聲演的嘉豪表示：「這個角色係新加入，唔可以睇返啲作品溫書，但係我有睇日本版本係點！其實大會有提供一個機密日本版本俾我睇，不過講日文、無字幕就唔明白，所以我大概睇下人哋把聲點配音。」自小愛看卡通片的嘉豪，笑言《蠟筆小新》是其中喜愛的作品之一，不過父母不准他睇漫畫，於是經常去洗手間匿埋睇，並笑謂覺得主角小新好曳，經常口花花撩姐姐，但認為這樣是好睇之處。
首次配音好考執生
對於今次聲演的難度，嘉豪坦言要配合返動畫角色的口形，可能10個句子，但變成5個字講完，於是要講得很快：「如果覺得句子太長或講得太急，導演會改咗啲字，所以臨場專注力好緊要。我執生能力都OK嘅，好彩我參與過廣播劇，睇住份稿去讀，但睇住稿又要睇住個畫面，呢個真係有難度！」
被問若再有機會、想挑戰哪個角色？嘉豪笑言想嘗試聲演小新爸爸野原廣志，因為可以鬧人又被老婆欺負，他說：「小新角色太根深蒂固，反而爸爸角色玩味重，今次比利角色好認真，係個好熱血嘅青年。」當笑問若然將來個囝囝似足「小新」，會開心還是擔心？他說：「我身邊啲朋友嘅小朋友，全部都係『小新』！佢哋周圍走又跑來跑去，搞到成身濕晒！爸爸去踢波又跟埋去，撞來撞去！其實我諗起每個小朋友都有呢個頑皮一面，我就未有生兒育女計劃，玩人哋嗰啲已足夠。」