吉吉：呢排冇乜聯絡

周吉佩（吉吉）、支嚳儀、龍婷及羅啟豪等昨日在電視城為今晚舉行的TVB台慶綵排，對於前日同是「中1生」生的曹敏寶推新歌，吉吉與支嚳儀均表示沒收到邀請，吉吉更連對方出歌也不知。

周吉佩昨戴口罩現身，表示因為還有十多天開騷，加上之前因病失過兩次聲，加上工作多不夠休息，所以好驚，又指為了個人騷停了教班工作。至於演唱會進度，他表示已練得七七八八，支嚳儀則笑言吉吉開騷當晚是兒子正日生日，到時會帶阿仔去吉吉演唱會當做生日禮物。
支嚳儀祝出歌順利
對於曹敏寶舉行新歌發布會，「中1生」中只有涂家堯及劉可撐場，問到吉吉和支嚳儀為何不去？吉吉驚訝表示：「冇收到通知，（咁friend都唔請？）我都唔知，真係唔知佢出咗新歌，呢排都冇乜聯絡，做嘢為主。（之後會唔會多返聯絡？）我搞掂演唱會先！」支嚳儀也表示沒收到邀請：「如果有都會去撐吓場，OK嘅，但冇收到邀請，祝佢順利。」
龍婷未敢求姻緣
至於經歷過「Hello Kiss」後甚少現身TVB的龍婷，被問到是否已解禁？她即指8月曾回來出席《中3》100強，「有大騷一定叫我哋返嚟，冇大騷就機會平均。」她透露剛從寧波回港，此行為一間佛寺開光唱心經。有否順便求姻緣？她耍手擰頭：「呢啲唔敢，工作、屋企人身體健康最緊要。」咳到失聲的她表示前晚才開聲，之後會隨明星足球隊到南昌做啦啦隊演唱，香港的工作還在洽談中。