Edan感謝姜濤力撐 望互相尊重

MIRROR、COLLAR、ERROR、P1X3L、ROVER等昨日出席ViuTV《CHILL  Music Festival》記者會。近日網頻JFFT與周殷廷合組JFYT、成員床哥為《叱咤》頒獎禮組合獎拉票，竟明踩呂爵安（Edan）指歡迎對方流失的票數投給JFYT，惹姜濤直斥床哥「冇品」。Edan昨日表示認識床哥，相信對方開玩笑並沒惡意，但有時玩笑過火，能夠理解；姜濤亦表明立場是尊重，不認同此拉票方式，但亦自認衝動，可以用溫和些的字眼。

對於姜濤出言力撐，Edan表示多謝、感到sweet，亦有留意JFFT特色和風格，看過床哥直播片，認識對方但沒交集，印象對方是有想法和聰明的人，「相信佢今次言論唔係有惡意，只係開玩笑for fun。但有時開玩笑會影響其他人或過火，最重要互相尊重，不要引起不必要紛爭，沒必要製造對立情況，大家做呢行係帶歡樂畀觀眾。」對於被床哥意指不專心工作，Edan強調工作放首位，百分百投入和認真，不會被任何事影響，又說與周殷廷是朋友，已收到對方傳短訊致歉，亦曾與周殷廷及床哥就此事傾電話、交流想法，了解床哥沒惡意，最重要是事件不要繼續發酵或引起更大紛爭。至於是否傾談後令床哥「跪低」致歉？Edan否認指大家純粹談想法，會否覺得床哥冇品？他指對方或因開玩笑而沒想太多，互相尊重便夠。
姜濤：唔係一句講笑就冇事
力撐兄弟的姜濤亦表明立場、尊重每個音樂單位和作品，尊重各人用自己的方法拉票，「係咪要用呢種方式爭取票數？我心目中唔認同，所以才會講呢番說話。再俾多次機會我，可能會用溫和啲嘅字眼去講，係有少少衝動。可以開玩笑，但我哋係公眾人物，一言一行受到好多人注視同效仿，我都經歷過類似事情，先知道我哋講嘅嘢係幾咁有份量。佢哋都係5強單位之一，我覺得作為公眾人物要將心比己。若果係你朋友會否咁講？呢個係我初衷，之後有咩我唔會再回應，我係就件事，絕對唔係針對佢哋音樂。」又強調並非一句講笑就沒事。有指爵屎（Edan粉絲）將票全投給姜濤，會否覺得贏面更大？姜濤稱絕不為此，純粹就事件開腔，不論風格怎樣也不應輕易評論他人。
此外，陳卓賢（Ian）是MIRROR唯一成員入圍新城「勁爆男歌手」5強，他感謝外界欣賞，不會跟隊友比較；Lokman大讚父親出戰跆拳道錦標賽好勁，父子曾切蹉過，還被爸爸打贏；Anson Lo日前重踏紅館任汪明荃演唱會嘉賓，他直言重回紅館感覺好複雜，當日告訴自己要專業，見觀眾支持而信心大增。