【阿碌開咪】上法庭記

　　久不久上法庭，會見到好多人生百態。年前到高院抽陪審員，笑到碌地，因被抽中者十之七八唔想做，於是作N個理由「呃」法官，部分演技出色過骨，部分則被踢爆兼被法官省到一面屁，笑死人。

　　最多係帶埋醫生紙，唔知真病定假病。

　　呢，上周小弟又有機會到法庭。因一宗單位外水泵鐵架唔合規格，搞呀搞，終又要到西九龍上庭。有幾個觀察，過癮。

　　一、屋宇署黑衣大漢。一上到法庭外，幾個黑色西裝友立即走埋嚟問：「請問你係咪上庭？」

　　呢種環境，我以前在醫院見得多。個心打突，直覺佢哋係「老Sell」。反問：「請問你係邊位？有乜職責呢？」對方禮貌周周答：「我哋係屋宇署檢控組嘅，負責控告你的。麻煩畀法庭信及身分證我對對啦。」

　　然後佢詳細解釋審訊流程：「曾先生，好快就完成㗎嘞。」（好似O氹BB打針。）難得告人嘅咁有禮貌，模範公務員呀。

　　二、法官又係佢。入到法庭，等呀等，等咗約四十分鐘，見到法官步出。咦，乜咁面善？原來法官是「萬能士」，上周報章見佢剛剛審完反修例刑事案，一轉身，僭建呢類咁悶濕碎案又要審。

　　法官大人也算是斯文有禮，見到啲擺明想「誤導」佢嘅被告，頗有耐性。例如明明有工做扮冇工做，博可憐，罰少啲。法官日日見N種被告，一聽已知對方扮野，只嚴肅勸佢：「從實招來！」果然扮冇收入者都有萬幾蚊一個月。

　　我上過交通案庭，又上埋僭建庭。見證呢類案件，香港千千萬萬，變化不大。日日流水作業式審訊，其實都幾「厭惡性」，難得眼前個官又幾投入。

　　三、釣魚保安員。個官投入啫，但午飯後，庭上兩個肥佬護衛員飯氣攻心。日日聽都係「三幅被」，全部僭建或交通案皆濕濕碎碎。律師及法庭文員也是機械式讀出案情，人人按程序走過場。咁鬼悶，點可以唔釣魚吖？兩肥可能日日搣大髀提自己：「喂，唔好瞓呀！」

曾智華

阿碌開咪