【金融High Tea】富豪話齋 錢多焗人炒股

　　港股牛年局大升，年初六開市略為消化，下午又再升過，恒指收市成功造出七連升。

　　陸羽仁與城中富豪拜年，富豪生意瓣數多，坦言多年來未試過學似去年做生意瓣瓣蝕，十種生意九種輸錢。富豪說現在有錢人要財富增值，只有兩條路，一係買股，一係買債，銀行對放貸耍手擰頭，但對融資買股買債就相當手鬆，投資市場水浸，有其背後之宏觀推手造成也。

中海油撲10元關

　　富豪投資從來不和大勢拗頸，笑言過去買股從不借孖展，現在銀行開到聲，都要做順德人，多多少少做番點。他說，美國聯儲局大放水，資金未必去到實體經濟，很多去了股市債市炒作，至少製造出財富效應，暫時發揮止痛作用。央行表明容忍較高通脹，未來物價上漲，手上食緊之三頭鮑今日賣八千，明年要賣一萬，這擺明是打劫銀行存戶，焗人賭博。

　　富豪拆局金錢遊戲係點玩，聽落遲早會爆，屆時不知如何收科，不過投資世界只講明天，不講明日之後，富豪覺得股市短期仲未係好危，自己的策略係眾人皆醉我不獨醒，最重要係酒醉三分醒，只賭自己輸得起的，最重要是不要一鋪清袋。現在個市升緊，最怕蝕底，廣東人教仔，「執輸行頭，慘過敗家」，就係他當前入市的格言。

　　富豪睇到大局，美國在民主黨上台後，打再通脹牌理更加清晰，因此資金不斷流入資產市場，傳統商品如銅、油都受追捧，皆因銀紙不值錢，原材料價格上升，係推動通脹的第一步，故此石油股近月再見久違的旺勢，三桶油中的中海油（883）直撲10元關口，收報9.97元，大升4.5%，油價回勇至5、60美元水平，這個景象相信是半年前油價插到負數時不能想像。另外兩桶油中石油（857）收報2.75元，無升跌；中石化（386）收報4.34元，升逾5%。

　　早前華府制裁龍頭國企，陸羽仁形容為美國派錢，當中最看好中海油，7元樓下叫過大家留意。雖然制裁帶來執平貨機會，但當中都有基本因素分別，中國在石油戰略上穩健中不忘進取，三桶油不容有失，在海外擴展的中海油就成為排頭尖兵，捱過低谷市況轉向就成為贏家。但無美國制裁的派錢因素，就無人為壓低股價，製造搵錢機會畀大家。

移卡獲欽點晉身紅底股

　　若論升幅，大市當然仲有其他股份炒得仲起勁，恒指七日累積勁漲1971點，收報31084點。科指繼續尋頂，以全日最高位收市，收報10945點，走高2.3%，連升五日，成交金額2079億元。港交所（388）下周放榜，股價高見570.5元創新高，上升2.83%，收報563.5元；友邦（1299）走高0.57%，收報105.6元，錄得十一連升。

　　藍籌科技股也有份領漲大市，近日獲批分拆光學業務的瑞聲（2018）進一步攀升，上揚7%，收報48.2元；非藍籌的科技巨企京東（9618）旗下京東物流日前遞交上市申請，有可能成為「京東系」第三隻在港股份，消息刺激京東攀越400元大關，一度急升7%，高見419.8元創新高，收市仍漲6%，報416.8元。

　　二線科技股亦是市場熱炒的焦點，再獲女股神Catherine Wood旗下ETF增持的移卡（9923），股價創新高兼晉身「紅底股」，收市急升26%；中國有贊（8083）急升15%；微盟（2013）亦破頂，大升10%。此外，比特幣突破5萬美元，資金繼續追入相關概念股，歐科雲鏈（1499）與火幣科技（1611）均狂飆逾兩成半；雄岸（1647）則炒高一成。

陸羽仁

原文刊於《頭條日報》