【阿碌開咪】《城市論壇》拜拜可惜？

昨日講到《城市論壇》的誕生，當然與整個社會的政治氣氛有關。

一九七七年，港英政府決定加速開放新聞自由及推行地方行政，邁向普選。立時香港人「有幸」突然享受到「爆炸式」的言論自由，面對權力，挑戰邊個都得，鬧邊個、窒邊個大官都冇問題，唔使擇日！

尤其一九九二年，前港督肥彭空降，更搞到「火上加油」。因佢身先士卒，鼓勵各級官員多多在傳媒曝光，舌戰群雄（這方面，中方官員難以比較，因不可隨便「亂噏」也）。肥彭作風，當然大受歡迎。《城市論壇》作為香港言論自由的圖騰，怎不成香港傳媒的寵兒？於是權力人物排隊亮相，記者次次收穫極豐。

回說《城市論壇》推出初期，因當年社會氣氛仍相對保守，絕少人願「冒險」公開發言，尤其觸及敏感的時事及政治。

作為負責人，小弟當然擔心直播時冇人願意出聲。咁點搞？於是先搵班「媒」，包括傳理系學生（之後個別成為傳媒高層）及各大團體代表人物「扮觀眾」。然後將節目一斬為二，頭半部由中文大學辯論隊出戰香港大學辯論隊，先「燒」去半集時間，令內容充實點。

那時我通過廣播車鏡頭外望，發覺港大辯論隊有兩位代表，口才非常勁，分別名陳志雲及石永泰，心諗兩人將來必非池中物！結果當然中到開巷。《城市論壇》至今要冚旗/收檔/暫停……我有冇特別感覺？丁點都冇。因在今天的大氣候，存在都唔會變回昔日面目。與其窒住窒住，有其貌而冇其神，不如收檔，留個回憶好了。

昨日講過， N咁多記者問小弟，對昔日的同事今天在港台的「表現」，有乜反應？

反乜鬼應吖，頂唔順的早已走得七七八八。有的留低，純為搵食。又或工作沒有敏感性，為乜要走？

至於個別，唉……任何時代都有某種人物甘願扮演某種角色㗎啦。

你睇李小龍套《精武門》就知，呢個世界，乜人都有㗎！

曾智華

阿碌開咪