阿碌開咪｜新特首冇氣唞

疫情雖繼續，拜年仍不停。當然，大家守法，只「手機拜年」，又或小組午餐相聚，繼續支持飲食業「活下去」！

約四位退休資深政界及官界老友飯聚，講乜？當然講政情！尤其與下任特首有關的情報及分析。

高人A：「林鄭表示中央請過佢去北京冬季奧運會，但佢推咗，寧願留港應付疫情。好怪啫，就算天冧，行開兩日有乜問題？若政府冇咗你唔得，咁就唔係上軌道管治啦！阿B，點睇？」

高人B：「對，任何特首，受到中央邀請，正路必飛身答應！尤其就快選下任。若林鄭有意去馬，豈會唔把握每一秒接近中央領導人？佢唔去，政治訊號清晰，下任應該是冇佢分。為免尷尬，故婉拒上北京。究竟是否如此，好快揭盅。阿C，你有乜觀察？」

高人C：「政府宣布選舉提名期，即中央有咗心目中人選㗎嘞。我都覺得換馬機會高。不過，新特首將會做到有氣冇碇唞！小弟做過局內人，當知一日未選到，仍可能有變數。故此，候選人根本唔能夠埋班。三月二十七日投票完成，無論邊個出任特首，都大大鑊㗎。正路，十幾個問責司局長全部到期下台，你想佢哋繼續都未必個個願意留低，故有機會大部分換馬！呢個工程，真係人都癲。阿D，你話係咪？」

高人D：「當然。首先，新特首要約見心目中班底作游說。呢類見面，當然不會在冷冰冰會議室，而要約秘密飯局。每個位最少食兩至三餐，因必會有人畀檸檬你食！單單食飯，都幾十餐，死未？好嘞，到辛辛苦苦埋到班，但最後任命權又不在你手。即係人選不可以先辭職，以免兩頭唔到岸。做得司局長，肯定重要人馬，無論在任何機構任高職，都應最少三個月至半年請辭啦下嘛。」

總結，特首由當選到組成新班底，然後落實名單交中央審批，獲得確認，再通知新班子人選辭職，組織宣誓……三個月咁短？怎不做到冇氣唞！但這只是漫漫艱苦長路的開始！

曾智華

阿碌開咪