阿碌開咪｜阿叔大忌：激瘦

 

周二早上打開報章國際版，見到一個阿伯，好熟口面，旁邊又站着另一個阿伯，唔識。

哈，編輯點解將呢兩位阿伯大頭相霸佔主要版位呢？究竟係「乜水」咁巴閉呢？

右邊一位，叫余茂春。啊啊，記得嘞，是上屆美國政府決策層的「中國問題軍師」。咁左邊一位係……睇到名字嘞……咦喂，唔係「化」，乜個款變咗咁？原來阿伯正是落任一年、只得五十八歲的美國前國務卿蓬佩奧！

點解小弟形容佢「搞成咁」？因昔日霸氣十足的「老蓬」，短短一年啫，瘦咗幾個碼，老晒。

可能昔日佢個款夠猛夠勁，原因多少來自脹卜卜的大件頭，充滿威勢及壓場感，真係唔知打唔打得都肯定嚇得。代表美國四出與各國周旋，未開口都已經住對手。

但如今？乜勢乜款都冇晒（單睇相）。最弊以前脹卜卜的皮膚，一激瘦立即變皺，尤其條頸，似十足漏氣氣球咁款。相比以前個巴閉型格，真是有點唔多順眼。

其實男人上咗年紀，太肥當然唔好。不過，肥開的人突然用藥物或瘋狂節食搞到快速急瘦，對身體對精神對外觀，皆非好事。眼前的蓬佩奧，就是最佳例子。

小弟同年紀朋友，相聚時，若對方突然激瘦，一定不會屬好事，真係絕不恭喜。

最多的是癌魔突襲，正常細胞及脂肪被癌細胞吞噬。一位早前去世老友，正是如此，可以在半個月內急瘦近二十磅。

另一種，是剛剛驗出有糖尿病或三高，立時嚇到騰騰震。由昔日大吃大喝到突然冇油冇糖冇鹽再加藥物。又係，咁搞法，當然「殊」聲唔見二十幾三十磅。呢類老友，見到佢哋日夜擔心，再冇晒歎美食美酒興趣，走入一個不快樂的極端，怎可能健康？而最弊，人又落晒形，點睇都不是好事，反多後來因欠缺均衡營養而百病叢生。

我認為最佳方法，藥物及食量控制當然必須，但運動也極重要，維持有一定脂肪及肌肉，如此才會更健康及有返個型格！

曾智華

阿碌開咪