阿碌開咪｜下任特首重中之重

昨日講到，無論林鄭願意否，都要開始一嘗「跛腳鴨」現實，看着自己權力日漸淡出的同時，一個又一個不尊重、冇面畀的冷面孔出現。　

現實世界，從來只見新人笑，哪管失勢舊人哭？「跟紅頂白」的傳媒也如是，點會再將寶貴Air Time及版面用在一個Outgoing人物？你主動約訪問都可能冇乜人睬。故此，林鄭應好好思考，仲有冇需要日日開記者會畀人冷落。

更理所當然，政界、商界及傳媒界，必將一切注視力放在新權力、新班子之上。

未來一個月，全部是一眾選委發出對下任特首要求的聲音（雖然你知我知佢哋其實冇乜權）。除刷存在感外，做得選委，當然希望市民大眾知道佢有個「超然身分」，「有權在手」也。

一眾建制大佬率先表態。例如行政會議成員葉國謙就列出一抽要求，小弟一聽，弊，佢重中之重要求為——新特首必須凝聚社會團結！

清楚記得，林鄭五年前競逐特首時，也曾提及首要任務為「修補社會撕裂」。結果點？事實勝於雄辯。在佢管治下，香港社會由普通撕裂變大型撕裂，都唔知點可以返轉頭。

其實小弟都好有興趣聽下葉國謙呢位政壇大佬，究竟又有乜法寶可以做到「社會和諧」。若佢冇，點解要求下任特首「不可為而為之」呢？

香港撕裂傷痕咁深，要重新大和解，尊重不同政見，吸納理性反對聲音，再有商有量開始政制發展步伐，方法唔係冇，我都有。不過，講咗出嚟都冇用，下任特首都肯定做唔到，不如用時間等一切「水到渠成」可也。

特首權力並非來自港人，而是來自北京，故此，必須清楚中央的期望，才算重中之重。

我一再反覆聽習近平主席、李克強總理及韓正副總理提出對下任特首的要求，集中一點——提升香港國際金融中心地位。

因為國家大格局，中美大較勁，「中心點」全在此。希望下任特首心領神會，不負國家所託，能幹出一番成就。

曾智華

阿碌開咪