青談｜行山要帶腦

上得山多終遇虎，獵犬終須山上喪，本用以提醒賭徒要量力而為、見好即收，皆因長賭必輸。換個應用場景，行山的初心，志在做點運動，舒展身心，呼吸新鮮空氣，欣賞大自然美景，鬆一鬆放一放空，唔係逞強搵命博。有些朋友愛一個人行山，其實係十分危險，零照應，一旦荒山野嶺手機冇電又或網絡不穩，真係唔知點算！

人定勝天，未必適用在登山涉水等野外運動，因為天有不測風雲；老人家常告誡欺山莫欺水，現實是山也不可欺，跟投資場上一樣，我們也要尊重敬畏大自然。安全第一，量力而為，有些表面低難度的行山路段如最平凡的荷蘭徑或紫羅蘭山徑，其中亦不乏一些崎嶇狹窄不平路，稍不留神或分心把玩手機，隨時有墮坡風險。行山要帶腦，山上時有野豬出沒，建議切勿以背心袋放食物提在手，否則必引來大小豬嘜一家大小垂涎甚至搶擒，還要順便噬你一啖冇仇報。

你可以話條命係你嘅，關人叉事，明白這是不少人的心態，如此有乜意外唔該你唔好打九九九，免得勞師動眾又消防又警察又救護甚至要出動飛行服務隊，仲要未必救得返，更慘係可能累及拯救隊中人，既然你咁勇，還請自救吧！無謂累己累人！唔帶腦行山都算，竟然有人揹着小朋友以身犯險，越過重重圍欄為行乾涸的下城門水塘，目的原來就係想睇吓乾塘，少見多怪當奇景，記者問你點解畀小朋友行落嚟？不怕危險嗎？一句小朋友「未見過」就成理由，未見過就可以罔顧生命危險以身犯險，如果這是道理，那麼如果未死過，係唔係又等於要鬥快死一次？教育水平唔低嘅香港人，何解時不時都會展視出其極盡歪理當真理之笑大人個口特異功能，都市異象見塘底龜裂，一跣腳失平衡，隨時又係一條人命，騎呢打卡文化驅使，崖壁山澗急流甚至火山口等危險地帶死亡陷阱，統統都成為紅與不紅KOL網紅擺高難度姿勢影相打卡熱點，挺胸收腹屹籮柚得非常百無禁忌，更難得山系女神制服低胸吊帶加緊身，不怕蚊，更不怕黃蜂尾後針，犀利。

胡孟青

 

青談