阿碌開咪｜罰款8千狀費80萬

早前睇報章，見到有單普通案件，被告上庭認罪，被法官照例訓示一輪，然後循例話：「案情嚴重，為向社會傳遞清楚訊息，本席判你罰款八千元！」吓？八千元，有幾嚴重呀？

最過癮，電視新聞見到被告散庭後，笑笑口離開，猛向旁邊位大狀打拱作揖，衷心致謝。

剛剛那位大狀Y乃我老友，又約咗前日晚飯，席間當然多口問佢：「嘩，咁細單嘢使乜請大狀呀？自己認罪求情都應該只罰幾千啦，仲要請到你？喂，罰款八千，睇個款，狀費可能八十……萬喎！」

大狀Y笑而不語，相信雖不中亦不遠矣，因為你由請佢那刻鐘就起表計錢。

「碌Sir，騎騎騎，值㗎！你知我做咗幾多嘢？首先，搞清個客做乜畀人告。然後，陪佢落口供，肯定佢唔會亂噏嘢中多幾條罪。仲有，肯定控方咪亂告或告多咗，又或告錯。呢啲乃專業知識，你哋普通人多數矇查查㗎！」

大狀Y滿滿自豪咁款，灌大啖紅酒。輕輕鬆鬆一單案最少執幾十萬元，真係……

「嗱，仲有呀，真正上庭前，要提議個客認或唔認罪。唔認，有乜Ground，打甩機會幾大，兼且要使多幾多訟費（因要排期再審）。若果認罪，我會替佢求情，寫到有咁誠懇得咁誠懇，一定要講到佢洗心革面，痛改前非……」

真㗎，間中我聽見班狀師替被告求情都想笑（相信法官也如是！），心諗，若你真係咁正人君子，孝順又有社會良心，又點會一時唔覺意犯罪呀？講笑咩？不過，你咁講我咁聽啦！

「碌Sir，其實請我做代表絕對值㗎，因幾十年經驗，在法庭出出入入，邊個官『姓乜』我完全掌握，不少更屬我師弟師妹，點都唔會去得太盡嘅。其實不少被告真係唔使請律師㗎，不過班友有頭有面又有錢，而通常任何罪都會最高刑罰罰幾錢外，另加可能監禁，咪個個腳軟唔博囉，千分之一機會坐監都咪搞呀！你睇去年某某電視明星咪係咁囉！」

曾智華

阿碌開咪