樂●活｜文具控必收好物

終於有時間同大家分享最近買到嘅好物！Laurie自問係一個文具控，雖然相比以前而家返工做嘢都係用電腦、手機為主，文具特別係紙筆真係畀以前用少咗好多，但依然改不了鍾意行文具店，發掘新文具嘅習慣。

向來日本三菱鉛筆（Mitsubishi Pencil）都係其中一個入手頗多嘅品牌，之前最愛係品牌嘅JetStream系列，出墨流暢，而且寫喺唔同質地、厚度嘅紙上一樣順滑，而且其墨液具防水及防變色，且書寫後，墨液立即變乾，唔會整花或者整污糟。

最近，就對Uniball One系列愈來愈鍾情，特別係佢愈出愈多色，令Laurie忍唔住想儲齊佢！最初，認識呢個系列嘅筆，主要係畀佢簡約嘅外表吸引，而且仲有唔同顏色嘅筆桿，以及有0.38mm同0.5mm綫幅可以揀，於是拎起一試，唔單止顏色吸引，而且寫字嘅時候非常順滑。

One系列除咗有單支裝之外，仲推出唔同主題、配色嘅3色盒裝。好似《Weekend》系列就有《Friday Night》、《Saturday Morning》及《Sunday Evening》，每盒分別會係2款限量色及1款恒常色，其中限量色嘅配色分別係熒光綠色和凌晨紫色、晴天藍色和棕櫚綠色，以及暮色紫色和雞尾酒橙色，至於恒常色就包括粉紅色、黃色和淺粉紅色。Laurie覺得呢個主題嘅顏色，最啱就係有寫開手帳，或者平時鍾意畫公仔嘅朋友，既有淡淡然嘅淡橙色，又有清新光亮嘅晴天藍色，仲有低調嘅凌晨紫色，最啱就用嚟以文字或圖畫，配上唔同顏色去記下心情。

充滿復古味、偏向柔和色調嘅《Classical World》系列就有多款Laurie鍾情嘅顏色。同樣係有3個唔同主題嘅3色盒裝，分別有《美國餐廳》嘅蘋果口香糖色、古董綠色汽車色及牛仔布藍色；《法國復古》就有桃味甜點色、米色玫瑰色及藍領帶色；《高領摩登》就係焦糖色、紫羅蘭色及玉露茶色組合而成。呢個系列同樣都有0.38mm同0.5mm單支裝出售，私心推介要入手牛仔布藍色同玉露茶色。

特別一提，One系列嘅黑色亦係必買之選，因為所用嘅黑色墨液係與別不同，墨液濃，就算喺黑色紙上寫，都可以清晰顯示之餘，重要見到寫出嚟嘅字係黑色，而非其他黑筆寫在黑紙上變成紅色或啡色嘅感覺。

之前睇三菱鉛筆嘅IG（@mitsubishipencilhk ）發現原來唔少本地插畫家會用One系列嚟創作，大家都可以向插畫家們偷師，或者攞吓靈感，點樣將One 系列用喺唔同地方。

講開三菱鉛筆一定要講埋今年喺日本雜誌文房具大賞2022鉛芯筆界別獲得第一嘅Uni Switch Kuru Toga x Alpha-Gel。先分享揸上手嘅感覺，筆桿手握位用上Alpha-Gel，手感舒適之餘，仲可以卸走書寫時嘅力度，寫得耐都唔怕手攰，翻查資料先知原來呢種物料平時係用於鞋內卸力，所以用喺筆桿手握位上就可以達到卸力嘅功效。

之前睇三菱鉛筆嘅IG（@mitsubishipencilhk ）發現原來唔少本地插畫家會用One系列嚟創作，大家都可以向插畫家們偷師，或者攞吓靈感，點樣將One 系列用喺唔同地方。

有時候好怕寫出嚟嘅字綫幅時粗時幼，雖然唔會影響閱讀，但總係覺得有啲礙眼！呢支得獎作嘅另一賣點就可以完美解決呢個問題，因為佢用咗三菱專屬機芯Kuru Toga，可以做到一邊寫一邊自動旋轉，寫出嚟嘅筆綫幅一致又夠尖銳嘅字。最吸引嘅係仲有Hold Mode內置功能，即係可因應使用需要將Kuru Toga自轉功能開畫關，用家就可隨意轉換粗幼筆綫幅，一支筆就可滿足畫圖、寫稿嘅需要，而Uni Switch 仲有0.3mm同0.5mm可以選擇。

 

如果鍾情Kuru Toga嘅技術，仲可以考慮入手Advance。外在看起簡約嘅Advance內置嘅專利自轉機芯比普通Kuru Toga版本轉快兩倍，可以令筆尖端更細緻更尖銳，而且因為Advance筆尖有金屬物料，令到筆嘅重量比普通版稍重，但亦都因為筆尖重咗，令佢嘅重心低咗，寫字嘅時候手感就更穩定。呢支筆另一細心位係可以將筆嘴可收回筆中，加強防折斷功能。Advance備有0.5mm或 0.3mm可選，更有冰藍色、Latte 咖啡色、香芋粉紫色同車厘子紅色等限量版筆桿可以選擇。

作者：Laurie Wu（愛保健愛旅遊愛購物的熟女）
[email protected]