阿碌開咪｜行人頭，跟鬼尾

上周染疫，被逼閉關，有乜好做？多咯，睇報章、上網、玩手機、寫稿、煲劇……

另外，每餐在寫字枱食，前面放部iPad，掃呀掃，在幾百條片中選有興趣的。

近期對睇政治KOL的興趣大減，可能個個立場太鮮明，佢未開口，我已知佢想講乜、會點講，吸引力自然略降。另外，不少又非常負能量，總之就係狂罵，日日罵，大佬，食飯時間，好惡頂㗎。唯有用手指一篤，飛走佢，以免眼睛食辣椒。

前晚又睇，掃呀掃呀掃，咦，好面善喎，哦……原來昔日中小學同學仔謝天賜（前港聯航空行政總裁），正與香港歷史學權威丁新豹教授，開講——甘棠第的前半生。

頭頭以為兩位講埋啲八股嘢加歷史建築，肯定Out到爆喇，有乜鬼好聽喎。點知，錯！與謝天賜（Andrew）七年同學，從來唔知原來佢講故事咁有節奏感。將自己的身世、家族發展史、大量混血兒在香港出生原因，以至掙扎求存及矛盾心態等等，娓娓道來，令我「吃」了一頓極豐富的晚餐！

佢也近七十歲了，乃香港鼎鼎大名何東的家族後人，原屬荷蘭籍猶太人，本非姓何，但因來自荷蘭，加上姓氏為Bosman，於是就直譯成「何」也。

初初與謝天賜同校時（聖若瑟書院有白種人、印度人、西洋人——中歐混血、星馬人……），覺得佢個樣鬼鬼哋，竟可講純正廣東話，奇在與白人鬼仔又冇乜交往，唔知點解。

終於，我三十年後訪問何鴻燊（佢上一代）才知道，原來在香港做「西洋仔」，真係兩頭唔到岸。中國人唔係中國人，英國（歐洲）人又唔係，夾在中間，滿不是味兒，不時也覺被白種人歧視。

所以，呢類香港混血兒，變自成一族，為爭一啖氣，相當勤奮。結果，出了不少名人，何東家族外，馬圈天王告東尼也是佼佼者。

謝天賜指佢哋在港境況——行人頭、跟鬼尾。人即中國人，鬼即英國人……大家自己意會點解啦。

曾智華

阿碌開咪