【逃犯條例】老婦撕毁連儂牆 女兒代致歉：撕咗可再貼毋須點人相

反對修訂《逃犯條例》的社會衝突持續，有反對修例市民自發在各區佈置支持示威的「連儂牆」標貼表達意見，但一名老婦昨日在大埔行人隧道撕毀一些標貼，引起反對者批評。而自稱是老婦的女兒在網上致歉，希望外界包容體諒。

有網民在群組「Tai Po 大埔」上載一張老婦的照片，稱「認住呢個阿婆，啲人勸佢收手唔好搣佢係都要堅持」，引發一群網民炮轟，「撕一貼百，好快阿婆就會見到成條隧道都係自己個樣㗎啦」；但也有人認為「貼嘅冇權，搣嘅都冇權，兩邊都有問題，所以打和啦！」、「勸佢離開！鬧人唔使用到啲字咁毒㗎！大埔人出名好心地！鬧咗個阿婆就毀咗大埔人形象！」。

一名自稱是老婦的女兒在同一群組回應，稱「我明白大家對於連儂牆貼紙被撕感到憤怒，但係我覺得撕左咪再貼囉，無謂特登點人相，又話要印出黎派，我認為咁樣有啲過火」。

女兒解釋，「我媽媽本身性格固執，改變唔到，即使我係黃都改變唔到佢，我諗大家意見唔同，我都會聽下佢既諗法。其實老人家都係唔想變，唔想亂，亦唔會去諗大家既做法背後既意義」。女兒指，「我都尊重佢，而佢今次咁激動去破壞啲野，佢只係太直率去表達佢自己既諗法，我向大家講聲對唔住」，她會同老人家再溝通，希望大家不要再針對其母親，集中對付違規警員、撤回修例等五大訴求。

有網民認為，「我覺得需要互相尊重，因為每一張Memo對於我哋嚟講都係有感情，用口講係冇問題，你鍾意咪寫你嘅訴求貼上去囉，但係如果動手嘅話，我覺得無論年輕定係年老，一視同仁」；更有人將矛頭對向女兒「樓主， 你知唔知大家花咗幾多精神，心機，時間，心血，甚至要冒上俾人打嘅危險?你講嗰句，『搣咗落嚟咪貼返上去囉』仲難聽過粗口」。