【專欄】聽見口號即彈開

反修例風波，並未因區議會選舉結束而淡化，繼續到何時，冇人說得準。

因此，各行各業就要各自修行，無論政治傾向如何，都要為生意及為生活作出部署。

早前小弟在此透露兩位巨星演唱會決定取消，幕後人寧蝕幾千萬元都要忍痛硬食，點解？正因兩位當紅歌手，有大量年輕歌迷，不少屬於非常熱血及前衞。社會如此氛圍，當然難保在演唱會中途，突然有粉絲約埋齊齊大喊口號（過去幾個月的足球賽，尤其對外隊，皆有此現象），又或帶同政治訊息橫額入場博曝光見報，咁主辦單位可以強力禁止嗎？

更甚，是兩位巨星走在潮流尖端，擺出思想開放形象，若演唱會高潮時，歌迷齊齊嗌政治口號，點回應呢？唔反應，被指逆群眾情緒，死得！若反應跟嗌，又死，內地市場分分鐘即時被封殺。不但歌手入黑名單，最大件事，連一眾幕後經理人公司、唱片公司、製作公司，以及內地所有演唱會合辦單位，可能有千計人士飯碗被打爛！

所以，近月所有唱片公司及經理人公司最高領導，皆早下死令，嚴禁歌手曝光時論及政治話題。免得過，全部避免出現任何公眾場合。若被逼出現，也要一律封口，不得有誤！

前晚，好好笑，大班老友聚餐埋年，內裏多是非傳媒百厭星，也有著名歌手阿K。大家「隊」多三幾杯後，自然玩到癲癲哋。影大合照時，有人為搞氣氛，突然大叫：「香港人！」

嘩！說時遲，那時快，阿K立即敏捷地由人群中彈開，企到遠處，雙手作交叉狀。

一眾見到佢個驚青款，笑到收唔到聲。

拍拍佢膊頭問：「K仔，私人場合，使唔使反應咁大呀？真係要咁緊張？」

「碌Sir，唉，你班友，個個已到收成期，當然可以冇有怕，盡量行使言論自由啦。我呢，正是人在江湖。若一個唔覺意被錄低混在政治口號人群中，即刻冇得返內地撈㗎！謀生攸關，故體內有偵察系統，一聽即有本能反應㗎喇！」（曾智華）

全文刊於《星島日報》「阿碌開咪」專欄