港人逼爆坪洲居民感困擾 小店怒斥：有人臨走仲搶購廁紙

新冠肺炎襲港，許多市民都避免去到熱鬧旺區逛街，改為遠走離島郊區放鬆一下。不過坪洲一間小店昨日就在網上發帖，斥責有本地遊客在島上搶購廁紙，有人更特意在碼頭召車運出市區，行為自私又離譜。

「點解你哋要嚟搶走我哋嘅廁紙呢？搶到要call車去中環碼頭接你？」小店表示，由於離島遠離市區，所以運送家用物資等都要花費更多的人力物力，而且數量、種類都比較少，很多時都是依靠居民之間互相幫助。「坪洲的貨物要舟車勞頓先至可以送到，貨運時間要比市區更久，貨種也比市區少很多，我哋係小社區，街坊都互相尊重、互相幫忙，早前物資恐慌過後再返貨時，大家會留手俾 真正有需要嘅街坊買。」

小店又在帖文訴說，遊客不時在島上喧嘩，破壞居民原有的安寧，令他們大感困擾。「香港遊客你哋嚟享受完我哋自在嘅空氣，在民居間大大聲喧嘩了一整天後，應該已卸下煩憂，帶著感恩的心輕鬆歸家啦！何苦要用搶走街坊廁紙嚟結束行程呢？這周末嘅瘋狂擾嚷已惹起居民義憤，聽說有人想發起行動了。」

最後小店在文末再三請求遊客要學懂愛惜離島這個家，並希望大家可以守秩序乖乖遊玩，以及不要搶購島上物資。「香港遊客：離島也是香港一部分，珍惜這個家，唔好搶爛它！嚟玩乖乖地細細聲玩唔得嘅咩？唔搶走離島居民物資唔得嘅咩？乖啦好心你哋！得唔得啫！」